Azərbaycan Milli Məclisi Fransada baş verən kütləvi etirazlar, polis zorakılığı, azyaşlıların ağır xəsarət alması və kütləvi saxlanılmalarla bağlı sərt bəyanat yayıb. Parlament Emmanuel Makron administrasiyasını həm dinc nümayişçilərin, həm də vətəndaşların təhlükəsizliyini təmin edə bilməməkdə ittiham edərək Fransanın ciddi siyasi və idarəetmə böhranı yaşadığını bildirib.
MSNews.az xəbər verir ki, Milli Məclisin oktyabrın 22-də açıqlanan mövqeyində Fransada sentyabr-oktyabr aylarında baş verən hadisələrdən dərin narahatlıq ifadə olunub.
Bu barədə “Trend” məlumat yayıb.
Bəyanatda qeyd olunub ki, təhsil sistemindəki problemlər, yaşayış xərclərinin artması və sosial narazılıqlar fonunda başlayan etirazlar oktyabrın 17-də Fransanın müxtəlif şəhərlərinə yayılıb. Parlamentin istinad etdiyi rəqəmlərə görə, həmin gün nümayişlərdə 550 min nəfər iştirak edib.
Milli Məclis xüsusilə uşaqlara qarşı polis zorakılığı barədə məlumatları kəskin pisləyib. Bəyanatda Lans şəhərində 15 yaşlı yeniyetmənin əlini, Müluzda isə 17 yaşlı qızın bir gözünün görmə qabiliyyətini itirməsi ilə bağlı iddialar diqqətə çatdırılıb. Bu hallar barədə müstəqil araşdırmanın aparılması tələb olunub.
Sənəddə 17 oktyabr hadisələri ilə əlaqədar təxminən 2400 nəfərin saxlanıldığı bildirilərək dinc toplaşmaq azadlığının məhdudlaşdırılması tənqid edilib. Qeyd olunan rəqəmlər və xəsarətlərlə bağlı məlumatlar parlamentin bəyanatında yer alır.
“Fransa dərin siyasi və idarəetmə böhranı yaşayır”
Milli Məclis hesab edir ki, Fransadakı hadisələr təkcə ictimai asayişin pozulması deyil, həm də hökumətin sosial problemlərin həllində və vətəndaşların təhlükəsizliyinin qorunmasında üzləşdiyi ciddi çətinliklərin göstəricisidir.
Parlamentin mövqeyinə görə, Makron administrasiyası bir tərəfdən dinc nümayişçiləri qeyri-mütənasib polis müdaxiləsindən, digər tərəfdən isə vətəndaşları və onların əmlakını iğtişaşlar zamanı zorakılıqdan qoruya bilməyib.
Bəyanatda Fransanın dənizaşırı ərazilərində, xüsusilə Qvadelup və Yeni Kaledoniyada insan hüquqlarının vəziyyətinə də toxunulub.
Azərbaycan parlamenti beynəlxalq təhqiqat tələb edir
Milli Məclis Fransa hakimiyyətini uşaqlara və dinc nümayişçilərə qarşı qeyri-mütənasib güc tətbiqinin qarşısını almağa, ağır xəsarətlərlə nəticələnən hadisələri araşdırmağa və məsul şəxsləri qanun qarşısında cavabdehliyə cəlb etməyə çağırıb.
Bununla yanaşı, Avropa Parlamenti və Avropa Şurası Parlament Assambleyası insan hüquqları məsələlərində ikili standartlara yol verməkdə ittiham olunub.
Azərbaycan parlamenti Fransanın milli istintaq qurumlarının hadisələri obyektiv araşdıracağına şübhə ifadə edərək BMT-nin İnsan Hüquqları Şurasını müstəqil beynəlxalq təhqiqat komissiyası yaratmağa çağırıb.
Qeyd edək ki, Azərbaycan Xarici İşlər Nazirliyi də oktyabrın 20-də Fransadakı təhlükəsizlik vəziyyəti ilə əlaqədar vətəndaşlara xəbərdarlıq edib. Nazirlik zəruri olmayan səfərlərdən çəkinməyi, Fransada olan Azərbaycan vətəndaşlarına isə kütləvi toplaşma yerlərindən uzaq durmağı tövsiyə edib.
