İspaniyanın “Barselona” klubunun gənc ulduzu Lamin Yamalın oktyabrın 26-da Londonda keçiriləcək “Qızıl top” mükafatlandırma mərasiminə özəl təyyarə ilə getməyi planlaşdırdığı bildirilir. İddiaya görə, futbolçunu səfərdə yaxın dostları və ailə üzvləri müşayiət edəcək.
MSNews.az xəbər verir ki, İspaniyanın “COPE” radiosunun jurnalisti Viktor Navarroya istinadən yayılan məlumatda Yamalın Londona uçmaq üçün şəxsi təyyarə sifariş etdiyi iddia olunur. Lakin səfər planının bu detalları barədə müstəqil təsdiq əldə edilməyib.
Məlumata əsasən, Yamal “Qızıl top”u qazanacağı təqdirdə dostları və yaxınları ilə birlikdə Parisə yollanmağı planlaşdırır. Fransa paytaxtında mümkün qələbənin qeyd olunması üçün hazırlıqların artıq tamamlandığı iddia edilir.
Qeyd edək ki, oxşar məlumatlar 2025-ci ildə də yayılmışdı. İspaniyanın “AS” və “Mundo Deportivo”nəşrləri həmin vaxt Yamalın Parisdə keçirilən mərasimə yaxınları ilə qatılacağını və mümkün qələbə üçün xüsusi şənlik hazırladığını yazmışdı.
UEFA-nın rəsmi məlumatına görə, 2026-cı ilin “Qızıl top” mərasimi oktyabrın 26-da ilk dəfə Londonda, London Palladium Teatrında keçiriləcək. Lamin Yamal da ilin ən yaxşı futbolçusu mükafatına namizədlər arasındadır.
