Oktyabrın 13-də Azərbaycan Respublikasının Prezidenti İlham Əliyevlə Laos Xalq Demokratik Respublikasının Prezidenti Thonqlun Sisulit arasında təkbətək görüş keçirilib.
MSNews.az xəbər verir ki, görüş Laos dövlət başçısının Azərbaycana rəsmi səfəri çərçivəsində Bakıda baş tutub.
Bundan əvvəl Prezident İlham Əliyev Laos Prezidenti Thonqlun Sisuliti rəsmi mərasimlə qarşılayıb. Mərasim zamanı hər iki ölkənin Dövlət himnləri səsləndirilib, fəxri qarovul dəstəsi dövlət başçılarının qarşısından keçib.
Qeyd edək ki, Laos Prezidentinin Azərbaycana rəsmi səfəri 13–14 oktyabr tarixlərini əhatə edir. Laosun dövlət informasiya agentliyi “KPL” xəbər verir ki, səfər Prezident İlham Əliyevin dəvəti əsasında həyata keçirilir.
Laos dövlət başçısının oktyabrın 15–16-da Bakıda keçiriləcək Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə toplantısında iştirakı da nəzərdə tutulur.
Prezidentlərin təkbətək görüşündə aparılan müzakirələrin konkret məzmunu barədə hələlik əlavə məlumat açıqlanmayıb.
