Rusiyanın xarici işlər naziri Sergey Lavrovun Azərbaycana səfər edəcəyi barədə məlumat yayılıb. Bildirilir ki, Rusiya diplomatiyasının rəhbəri oktyabrın 15-də Bakıda keçiriləcək Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Görüşündə iştirak edəcək.
MSNews.az xəbər verir ki, yayılan məlumata əsasən, Sergey Lavrovun Bakıya səfəri beynəlxalq sammitlə əlaqədardır.
AQEM-in rəsmi məlumatına görə, VII Zirvə Görüşü 2026-cı il oktyabrın 15-də Azərbaycanın sədrliyi ilə Bakıda təşkil olunacaq.
Sammitdə üzv dövlətlərin liderləri və nümayəndələri, müşahidəçi ölkələrin, eləcə də beynəlxalq təşkilatların təmsilçiləri iştirak edəcəklər.
Görüşün əsas gündəliyini Asiyada təhlükəsizliyin və sabitliyin möhkəmləndirilməsi, dövlətlər arasında etimadın artırılması və çoxtərəfli əməkdaşlığın genişləndirilməsi təşkil edir.
Tədbirdə regional və beynəlxalq təhlükəsizlik məsələlərinin, eləcə də təşkilatın gələcək institusional inkişafının müzakirəsi nəzərdə tutulur.
Bakıda keçiriləcək sammitdə digər ölkələrin də yüksək səviyyəli nümayəndələri iştirak edəcəklər.
Çinin Xarici İşlər Nazirliyi xarici işlər naziri Van İnin sammitə Prezident Si Cinpinin xüsusi nümayəndəsi kimi qatılacağını rəsmən açıqlayıb.
Özbəkistan Prezidenti Şavkat Mirziyoyevin də oktyabrın 14–15-də Azərbaycana işgüzar səfəri və sammitdə iştirakı təsdiqlənib.
Lavrovun Bakıya səfəri baş tutarsa, Azərbaycan və Rusiya nümayəndələri arasında ikitərəfli təmasların keçirilməsi də mümkün ola bilər. Lakin belə bir görüşün nəzərdə tutulduğu barədə rəsmi məlumat yoxdur.
