İspaniyanın Sevilya şəhərində keçirilən ənənəvi korrida zamanı tanınmış matador Xose Antonio Morante de la Puebla ciddi xəsarət alıb. Yerli medianın məlumatına görə, döyüş zamanı öküz matadora hücum edərək onu sol nahiyəsindən yaralayıb.
Hadisə nəticəsində heyvanın buynuzunun matadorun bədəninə təxminən 10 santimetr daxil olduğu bildirilir. İspaniya mətbuatının yazdığına görə, xəsarət düz bağırsaq nahiyəsinə qədər çatıb və idmançı təcili tibbi yardıma aparılıb.
Həkimlər tərəfindən ilkin müdaxilə edildikdən sonra matadorun vəziyyətinin stabilləşdirildiyi qeyd olunur. Hazırda onun nəzarət altında müalicəsi davam edir.
Xose Antonio Morante de la Puebla İspaniyada ən məşhur matadorlardan biri hesab olunur və uzun illərdir korrida arenasında çıxış edir. Hadisə ölkədə geniş rezonans doğurub.
Korrida İspaniyada ənənəvi mədəniyyət elementlərindən biri sayılsa da, son illər təhlükəliliyi və heyvan hüquqları səbəbindən ciddi mübahisələrə səbəb olur.
