ABŞ prezidenti Donald Tramp İranla Qətərin paytaxtı Dohada keçiriləcəyi bildirilən danışıqlar barədə açıqlama verib.
MSNews.az xəbər verir ki, Tramp jurnalistlərə açıqlamasında ABŞ nümayəndə heyətinin Qətərə yollandığını bildirib. Onun sözlərinə görə, prosesin necə nəticələnəcəyini zaman göstərəcək.
“Reuters”in məlumatına görə, ABŞ tərəfi Trampın xüsusi nümayəndəsi Stiv Uitkoff və Cared Kuşnerin Dohada İranla bağlı yüksək səviyyəli görüşlərdə iştirak edəcəyini açıqlayıb. Ağ Ev sözçüsü Kerolayn Livitt bildirib ki, əsas görüşlərlə yanaşı texniki danışıqların da davam etdirilməsi planlaşdırılır.
Tramp Dohadakı görüşün əhəmiyyəti barədə danışarkən ehtiyatlı mövqe sərgiləyib. “CBS News”un məlumatına görə, ABŞ prezidenti görüşün “əhəmiyyətli də ola biləcəyini, olmaya da biləcəyini” deyib və nəticənin prosesdən asılı olacağını vurğulayıb.
Tramp eyni zamanda ABŞ-ın İranla qarşıdurmada “hərbi baxımdan qalib gəldiyini” iddia edib. Onun sözlərinə görə, Vaşinqtonun əsas məqsədi İranın nüvə silahına malik olmasının qarşısını almaqdır.
“Söhbət İranın nüvə proqramının ləğvindən gedir. Biz onların nüvə silahına malik olmasını istəmirik və onlar buna sahib olmayacaqlar”, – Tramp bildirib.
ABŞ prezidenti iddia edib ki, Tehran da nüvə silahına sahib olmamaqla bağlı mövqe ilə razılaşıb. Lakin bu bəyanat İran tərəfindən rəsmi şəkildə təsdiqlənməyib.
“The Guardian” yazır ki, İran Xarici İşlər Nazirliyinin sözçüsü İsmayıl Bəqayi ABŞ tərəfi ilə yaxın günlərdə heç bir səviyyədə danışıqların planlaşdırılmadığını bildirib. O, İran nümayəndə heyətinin Dohaya səfərinin ABŞ-la yekun razılaşma danışıqları anlamına gəlmədiyini qeyd edib.
Bununla belə, Vaşinqton Dohadakı təmasları iyunun 17-də imzalandığı bildirilən 14 bəndlik anlaşma memorandumu ilə əlaqələndirir. Həmin sənəd dörd aylıq qarşıdurmanın dayandırılması və Hörmüz boğazının yenidən açılması məqsədi daşıyırdı.
Tramp İranla bağlı açıqlamalarından başqa, ABŞ daxili siyasətində kommunizm mövzusuna da toxunub. O, “sosial-demokrat” ifadəsinin daha yumşaq səsləndiyini, lakin əslində bunun kommunizm olduğunu iddia edib.
Tramp kommunizmi ABŞ üçün Birinci Dünya müharibəsi, İkinci Dünya müharibəsi, Perl Harbora hücum və 11 sentyabr terror aktlarından daha böyük təhlükə kimi təqdim edib.
Tramp Demokratlar Partiyasının radikal sol qanadının güclənməsini ölkənin 250 illik tarixində ən ciddi təhlükələrdən biri adlandırıb. O, bunu “Amerika Birləşmiş Ştatlarına kommunizmin gətirilməsi” kimi qiymətləndirib.
