Kanadanın neft və təbii qaz ehtiyatları ilə zəngin Alberta əyalətində ölkədən ayrılmaq istiqamətində hüquqi prosesin başlanması ilə bağlı keçirilən referendumda seçicilərin böyük əksəriyyəti separatizmə qarşı çıxıb. İlkin nəticələrə əsasən, səsvermə iştirakçılarının təxminən 76 faizi Albertanın Kanadanın tərkibində qalmasını dəstəkləyib.
MSNews.az xəbər verir ki, oktyabrın 19-da keçirilən referendumun nəticələri barədə Kanadanın “CBC News” telekanalı məlumat yayıb.
“Reuters” agentliyinin məlumatına görə, bu, Albertanın Kanadadan ayrılması məsələsi ilə bağlı əyalət tarixində keçirilən ilk referendum olub.
Referendumun ilkin nəticələrinə əsasən, Kanadada qalmağı dəstəkləyənlər 76%, ayrılma prosesini dəstəkləyənlər isə sadəcə 23%-dir.
Seçicilərə iki variant təqdim olunub: Albertanın Kanadanın əyaləti olaraq qalması və ya ölkədən ayrılmaq məqsədilə gələcəkdə hüquqi qüvvəyə malik referendumun keçirilməsi üçün prosedurların başlanması. Səsvermə məsləhət xarakteri daşıyıb və birbaşa müstəqillik elan edilməsi anlamına gəlməyib.
Karni səsvermənin Kanada vətəndaşlarının ölkənin birliyinə bağlılığını nümayiş etdirdiyini bildirib. Əslən Albertadan olan hökumət başçısı referendumdan əvvəl də əyalət sakinlərini ölkənin tərkibində qalmağa çağırmışdı.
Bununla belə, həmin təmaslar ABŞ hökumətinin Albertanın ayrılmasına dair rəsmi siyasət qəbul etdiyini göstərmir. Əyalətin Baş naziri Daniel Smit də Albertanın Kanadanın tərkibində qalmasını dəstəkləyib. O, eyni zamanda, əyalətin federal hökumət qarşısında hüquq və səlahiyyətlərinin genişləndirilməsini müdafiə edir.
Separatçı qüvvələrin əsas narazılıqları isə Kanadanın federal enerji siyasəti, təbii sərvətlər üzərində nəzarət və vergilərin bölüşdürülməsi məsələləri ilə bağlıdır.
“Financial Times” nəşrinin məlumatına görə, referendumda 1,35 milyondan çox bülleten verilib və iştirak səviyyəsi təxminən 43 faiz təşkil edib.
