Yəmənin husiləri Marib və Hədramaut vilayətlərində Səudiyyə Ərəbistanının dəstəklədiyi hökumət qüvvələrinin hərbi mövqelərinə ballistik raket və pilotsuz uçuş aparatları ilə genişmiqyaslı zərbələr endirib.
MSNews.az xəbər verir ki, “Reuters” Yəmən hökumətindəki mənbələrə istinadən hücumlarda azı 30 hərbçinin öldüyünü bildirib. Ölənlərin sayının arta biləcəyi qeyd olunur. Husilər isə Marib və Hədramautdakı Əl-Rüveyk, Əl-Əbr və Əl-Səniyə bölgələrində hərbi qüvvələrin cəmləşdiyi əraziləri vurduqlarını açıqlayıblar.
“Associated Press” məlumat verir ki, hücumlar nəticəsində azı 50 nəfər də yaralanıb. Husi hərbi sözçüsü Yəhya Səri zərbələrin ballistik raketlər və PUA-larla həyata keçirildiyini, əməliyyatın bölgədə Səudiyyə Ərəbistanının dəstəklədiyi qüvvələrin hərbi fəallığının artmasına cavab olduğunu bildirib. Husilərin “yüzlərlə ölən və yaralanan” barədə açıqlaması müstəqil şəkildə təsdiqlənməyib.
Yəmənin Müdafiə Nazirliyi hücumlara “uyğun vaxt və yerdə” cavab veriləcəyini açıqlayıb. Ölkənin səhiyyə naziri isə Marib və Hədramautdakı tibb müəssisələrinə yaralıların qəbulu üçün hazırlıq səviyyəsini yüksəltməyi tapşırıb. “The Guardian” bəzi mənbələrin ölənlərin sayını 58-ə qədər göstərdiyini yazsa da, daha etibarlı və geniş təsdiqlənmiş ilkin rəqəm hazırda azı 30 nəfərdir.
Bununla yanaşı, sosial mediada və bəzi kanallarda Səudiyyə Ərəbistanının dəstəklədiyi qüvvələrin zərbələrdən sonra Maribdəki mövqelərini kütləvi şəkildə tərk etdiyi barədə məlumatlar yayılıb. Lakin MSNews.az-ın yoxladığı “Reuters” və “Associated Press” materiallarında belə bir geri çəkilmə təsdiqlənmir. Buna görə həmin məlumatı hazırda qəti fakt kimi təqdim etmək mümkün deyil.
Son hücumlar 2022-ci ildən sonra Yəməndə hökumət qüvvələri ilə husilər arasında baş verən ən ciddi hərbi eskalasiyalardan biri hesab olunur. Səudiyyə Ərəbistanı 2015-ci ildən Yəmənin beynəlxalq səviyyədə tanınan hökumətini dəstəkləyir.
