Birləşmiş Millətlər Təşkilatının (BMT) Baş katibi Antonio Qutyerreş oktyabrın 15-də Ermənistana səfərə gəlib. Səfərin əsas məqsədi İrəvanda keçiriləcək BMT-nin Bioloji Müxtəliflik haqqında Konvensiyası üzrə Tərəflər Konfransının (COP17) liderlər sammitində iştirak etməkdir.
MSNews.az xəbər verir ki, bu barədə Ermənistanın “Armenpress” dövlət xəbər agentliyi məlumat yayıb.
Səfər çərçivəsində BMT rəhbərinin Ermənistanın yüksək vəzifəli rəsmiləri ilə bir sıra görüşlər keçirməsi nəzərdə tutulur.
BMT-nin açıqlamasına əsasən, Quterreş Ermənistanın Baş naziri Nikol Paşinyan və Prezident Vaaqn Xaçaturyanla görüşəcək. Tərəflərin BMT ilə Ermənistan arasında əməkdaşlıq və regional təhlükəsizlik məsələlərinə toxunacağı gözlənilir.
Antonio Quterreşin səfəri Ermənistanda keçiriləcək beynəlxalq ekoloji tədbirlə əlaqədardır. COP17 çərçivəsində liderlər sammiti oktyabrın 16-da baş tutacaq. Bioloji Müxtəliflik haqqında Konvensiyanın Tərəflər Konfransının əsas iclasları isə oktyabrın 19-dan 30-dək davam edəcək.
Sammitdə biomüxtəlifliyin qorunması, ekosistemlərin mühafizəsi, iqlim dəyişikliyinin təsirləri və davamlı inkişaf məsələlərinin müzakirəsi nəzərdə tutulur.
BMT-nin məlumatına görə, Quterreş tədbirdə çıxış edərək iqlim böhranı, ərzaq təhlükəsizliyi və biomüxtəlifliyin azalması kimi problemlərin bir-biri ilə əlaqəsinə diqqət çəkəcək.
