Transmilli mütəşəkkil cinayətkarlıq və narkotik dövriyyəsi ilə əlaqədə şübhəli bilinən Manoj Suranqa Liyanage, ləqəbi ilə “Batuwatte Chamara”, Azərbaycanda saxlanıldıqdan sonra Şri-Lankaya aparılıb.
Şri-Lanka mediasının məlumatına görə, 48 yaşlı şəxs mayın 10-u axşam saatlarında Hindistan və Dubay üzərindən Kolombodakı Bandaranaike Beynəlxalq Hava Limanına çatdırılıb.
“Newswire” yazır ki, Şri-Lankanın Dövlət Kəşfiyyat Xidmətinin məlumatına əsasən, əməliyyat Azərbaycan Dövlət Təhlükəsizliyi Xidməti ilə birgə həyata keçirilib. Şri-Lanka polisinin xüsusi qrupu mayın 7-də Azərbaycana gələrək onun ölkəyə aparılması prosesini icra edib.
Manoj Suranqa Liyanage Şri-Lankada bir sıra ağır cinayət işləri üzrə əsas fiqurlardan biri hesab olunur. “Daily Mirror”-un məlumatına görə, o, yüksək profilli mütəşəkkil cinayət hadisələri, o cümlədən “Thusitha Halloluwa”-ya hücum və “Ganemulla Sanjeewa”nın qətli zamanı istifadə edildiyi iddia olunan silahın təmin edilməsi ilə əlaqələndirilir. Şri-Lanka polisi onu ölkədə narkotik paylama şəbəkəsinin əsas simalarından biri kimi qiymətləndirir.
Məlumata görə, “Batuwatte Chamara” uzun müddət hüquq-mühafizə orqanlarından gizlənib. Araşdırmalar onun əvvəlcə Dubayda yaşadığını, təxminən bir il əvvəl isə Azərbaycana keçdiyini göstərib. Daha sonra o, Azərbaycanda müəyyən edilərək saxlanılıb.
Şri-Lankaya çatdırıldıqdan sonra şübhəli şəxs Kolombo Cinayət Bölməsinə təhvil verilib. “Hiru News”-un məlumatına görə, onun barəsində saxlanma orderinin alınması gözlənilir və istintaqı Kolombo Cinayət Bölməsi davam etdirir.
