ABŞ Prezidenti Donald Tramp İrandakı hərbi əməliyyatlardan sonra Amerika hərbi gəmilərinin Kuba sahillərinə yaxınlaşa biləcəyini bəyan edib. Dövlət başçısı Vaşinqtonun Kuba məsələsini həll etmək niyyətində olduğunu bildirərək adaya hərbi müdaxilə ehtimalını yenidən gündəmə gətirib.
MSNews.az xəbər verir ki, Tramp bu açıqlamanı oktyabrın 23-də Florida ştatının Fort-Mayers şəhərində keçirilən seçki mitinqində səsləndirib.
Bu barədə “Reuters” və “Anadolu Agentliyi” məlumat yayıb.
ABŞ Prezidenti İrandan qayıdacaq hərbi gəmilərin Kuba yaxınlığında dayanacağı ssenarisini təsvir edib.
“İrandan qayıdacağıq. O möhtəşəm gəmilər Kubanın yanından keçəcək. Onlardan biri sahildən təxminən 50 yard məsafədə dayanacaq. Onlar əllərini qaldıracaqlar, sonra isə razılaşmanı yekunlaşdırmaq üçün Marko Rubionu göndərəcəyik”.
Trampın sözlərinə görə, ABŞ-nin dövlət katibi Marko Rubio Kuba ilə bağlı mümkün razılaşmanın əldə olunmasında əsas rol oynayacaq.
“Associated Press” agentliyinin məlumatına görə, Tramp daha əvvəl də Kubaya hərbi müdaxilə ehtimalını gündəmə gətirmişdi. May ayında o, ABŞ prezidentlərinin onilliklər ərzində Kubaya müdaxiləni nəzərdən keçirdiyini, bu addımı isə özünün ata biləcəyini söyləmişdi.
Bununla yanaşı, ABŞ-nin dövlət katibi Marko Rubio da Kubada siyasi dəyişiklik istəyən vətəndaşlara müraciət edərək onları fəaliyyətə çağırıb. O, bu prosesdə ABŞ Mərkəzi Kəşfiyyat İdarəsi (CIA) ilə əməkdaşlıq imkanlarına toxunub.
Qeyd edək ki, Tramp daha əvvəl Kuba ilə razılaşmanın mümkün olduğunu və bunun üçün hərbi müdaxiləyə ehtiyac qalmaya biləcəyini də bildirmişdi.
