Azərbaycan 2027-ci ildə Müstəqil Dövlətlər Birliyində həmsədr kimi fəaliyyət göstərəcək. Prezident İlham Əliyev Azərbaycanın 2028-ci ildə isə MDB-yə sədrlik etməyə və həmin il təşkilatın Dövlət Başçıları Şurasının iclasını keçirməyə hazır olduğunu açıqlayıb.
MSNews.az xəbər verir ki, dövlət başçısı bu barədə oktyabrın 9-da Türkmənbaşı şəhərində keçirilən MDB Dövlət Başçıları Şurasının iclasında çıxışı zamanı danışıb.
İlham Əliyev Azərbaycanın 2027-ci ildə MDB-də həmsədrliyinə dair qərarın dəstəklənməsinə görə iştirakçı dövlətlərə təşəkkür edib və bunu Azərbaycana göstərilən yüksək etimadın təzahürü kimi qiymətləndirib.
Prezident bildirib ki, Azərbaycan MDB çərçivəsində qarşıda duran ümumi vəzifələrin həyata keçirilməsində fəal iştirak etməyə hazırdır.
Dövlət başçısı eyni zamanda Özbəkistan Prezidenti Şavkat Mirziyoyevə ölkəsinin 2027-ci ildə MDB-yə sədrliyi dövründə uğurlar arzulayıb.
İlham Əliyev Azərbaycanın 2028-ci ildə MDB-yə sədrlik etməyə hazır olduğunu da açıqlayıb. O, həmin ilin payızında MDB Dövlət Başçıları Şurasının iclasının Azərbaycanda təşkil olunmasının mümkünlüyünü qeyd edib.
Bu qərar Azərbaycanın MDB çərçivəsində siyasi və institusional rolunun daha da artacağını göstərir.
