ABŞ Federal Təhqiqatlar Bürosunun (FTB) Vaşinqtondakı 50 illik C. Edqar Huver binası rəsmi şəkildə və daimi olaraq bağlanacaq. Bu barədə FBI direktoru Kaş Patel bəyan edib.
Patel sosial mediada etdiyi açıqlamada bildirib ki, 20 ildən çox müddətdə müzakirə edilən binanın bağlanması planı nəhayət təsdiqlənib və qərar icra olunacaq. Hazırda FTB əməkdaşlarının keçmiş ABŞ Beynəlxalq İnkişaf Agentliyinin (USAID) istifadə etdiyi binaya köçürülməsi planlaşdırılır.
1975-ci ildə Pennsylvania Avenue üzərində açılan və brutalist memarlıq nümunəsi hesab edilən Huver binası uzun illərdir tənqidlərin mərkəzində olub. Binanın köhnəlmiş infrastrukturu və FTB-nin cari ehtiyaclarına cavab verməməsi səbəbindən onun bağlanması qərarlaşdırılıb.
Yeni plan çərçivəsində FTB-nin mərkəzi Ronald Reyqan Beynəlxalq Ticarət Mərkəzinə köçürüləcək ki, bu da Daxili Təhlükəsizlik Nazirliyi, Ağ Ev və digər federal qurumlara yaxınlığı ilə diqqət çəkir.
Qərar Prezident Donald Tramp ilə birgə işləməyin nəticəsi kimi qiymətləndirilir. Patel bildirib ki, əvvəlki planlarda yeni FTB binası tikmək üçün təxminən 5 milyard dollar xərclənəcəkdi və layihə yalnız 2035-ci ildə tamamlanacaqdı, lakin bu plan ləğv edilərək köhnə binadan köç qərarı verilib.
FTB-nin yeni məkanı hazırkı binanın yerinə daha müasir və təhlükəsizlik baxımından daha uyğun hesab olunur. Köç prosesi başlamış olsa da, binanın tam olaraq nə vaxt bağlanacağı və köçün nə zaman tamamlanacağı hələ dəqiq müəyyən edilməyib.
