Almaniya ABŞ qüvvələrinin Ərbildə yerləşən çoxmillətli bazadan çıxması fonunda İraq Kürdüstanındakı hərbi mövcudluğunu azaldaraq hava limanı yaxınlığındakı düşərgəsini bağlayacaq.
MSNews.az xəbər verir ki, “L’Orient Today” alman hərbçilərinin sentyabrın sonunadək düşərgəni tərk edəcəyini bildirib. Qərar barədə Almaniya parlamentinin Müdafiə Komitəsinə məlumat verilib. Hazırda düşərgədə təxminən 30 Bundesver hərbçisi xidmət edir.
Almaniya Müdafiə Nazirliyinin nümayəndəsi Ərbildəki şəxsi heyətin uzunmüddətli perspektivdə azaldılacağını təsdiqləsə də, bunun Almaniyanın bölgədən tamamilə çıxması demək olmadığını vurğulayıb. Berlin kürd peşmərgə qüvvələrinə məsləhət və dəstək göstərilməsini davam etdirməyi planlaşdırır.
“N-TV” yazır ki, ABŞ qüvvələrinin çoxmillətli düşərgədən çıxması ilə alman hərbçiləri Amerika tərəfinin təmin etdiyi hava hücumundan müdafiə imkanlarından məhrum olacaqlar. Buraya bazanın raket və pilotsuz uçuş aparatlarından qorunmasında istifadə olunan ABŞ HHM sistemləri də daxildir.
Ərbil hava limanı yaxınlığındakı düşərgə son aylarda bölgədəki gərginlik fonunda dəfələrlə raket və PUA hücumları təhlükəsi ilə üzləşib. Hücumların birbaşa Bundesveri hədəfə almadığı bildirilsə də, alman hərbçiləri çoxmillətli bazada yerləşdikləri üçün dəfələrlə sığınacaqlara keçməli olublar.
Düşərgə bağlandıqdan sonra azsaylı alman hərbi müşavirləri Ərbildə qalacaq. Onların fəaliyyətini hava limanındakı bazadan deyil, Almaniyanın şəhərdəki Baş Konsulluğundan davam etdirəcəyi bildirilir. Müdafiə naziri Boris Pistorius peşmərgə qüvvələrinə göstərilən məsləhət dəstəyinin dayandırılmasını nəzərdə tutmur.
Bundesver 2015-ci ildən ABŞ-nin rəhbərlik etdiyi beynəlxalq koalisiyanın İŞİD-ə qarşı əməliyyatlarında iştirak edir. Alman hərbçiləri İraqda yerli təhlükəsizlik qüvvələrinin hazırlanması, hərbi məsləhət, logistika, tibbi yardım və koordinasiya vəzifələrini yerinə yetiriblər. Bundesver İŞİD-in ərazi nəzarətini itirməsinə baxmayaraq, təşkilatın region üçün təhlükə yaratmaqda davam etdiyini bildirir.
Almaniyanın qərarı İraqdakı bütün hərbi iştirakının başa çatması deyil. Söhbət əsasən Ərbil hava limanı yaxınlığındakı düşərgənin bağlanmasından və ölkənin şimalındakı hərbi kontingentin azaldılmasından gedir.
