Ukrayna Prezidenti Volodimir Zelenskinin son açıqlamaları Rusiya ilə müharibə, Moskvanın iqtisadi imkanları və Kiyevin Avropa İttifaqına inteqrasiyası mövzularını yenidən gündəmə gətirib.
MSNews.az Ukrayna Prezidentinin rəsmi saytına istinadən xəbər verir ki, Zelenski Rusiyanın sülh təkliflərini rədd etdiyini və müharibəni davam etdirmək niyyətini açıq şəkildə göstərdiyini bildirib. Onun sözlərinə görə, Ukrayna müharibənin başa çatması üçün bütün təklifləri təqdim etsə də, Moskva hər dəfə bundan imtina edib.
Zelenski qeyd edib ki, Rusiyanın siyasi rəhbərliyi tammiqyaslı müharibənin əvvəlindən Donetsk vilayətinin tam ələ keçirilməsi üçün dəfələrlə son tarix müəyyən edib. Ukrayna liderinin sözlərinə görə, Rusiya ordusu üçün Donetsk vilayətinin tutulması ilə bağlı artıq 15 dəfə müddət qoyulub, lakin bu məqsəd həyata keçirilməyib.
Ukrayna Prezidenti rusiyalıları da müharibənin nəticələri barədə düşünməyə çağırıb. “Reuters” agentliyinin məlumatına görə, Zelenski hələ səfərbərliyə cəlb olunmayan və yanacaq növbələrində mübahisə edən rusiyalıların onları qarşıda nə gözlədiyini ciddi düşünməli olduqlarını bildirib.
Bu açıqlama Rusiyada yanacaq çatışmazlığı ilə bağlı məlumatlar fonunda səslənib. “Associated Press” yazır ki, Ukraynanın Rusiya neft infrastrukturlarına zərbələrindən sonra ölkədə yanacaq istehsalı azalıb. Agentliyin məlumatına görə, Rusiyada benzin istehsalı illik müqayisədə 17 faiz aşağı düşərək gündəlik 850 min barrelə enib.
Zelenski Rusiya iqtisadiyyatının zəifləməsinin Ukraynaya edilən hücumların miqyasına da təsir etdiyini deyib. “Ukrainska Pravda”-nın məlumatına görə, Ukrayna lideri Dublində keçirilən mətbuat konfransında Rusiyanın iqtisadiyyatı daraldıqca kütləvi hücum imkanlarının da azaldığını bildirib. O vurğulayıb ki, bu, Ukraynada qurbanların sayına birbaşa təsir göstərir.
Ukrayna lideri eyni zamanda Kiyevin Avropa İttifaqına üzvlük prosesinin sürətləndirilməsinin bütün Avropa ölkələrinin marağında olduğunu deyib. “Euronews”-un məlumatına görə, Zelenski Dublində keçirilən tədbirdə Ukraynanın Aİ-yə mümkün qədər tez qəbul edilməsinin Avropa üçün vacib olduğunu bildirib. O qeyd edib ki, Ukrayna yalnız özünü deyil, Avropanın digər ölkələrini də müdafiə edir. (euronews)
Ukrayna Prezidentinin rəsmi saytı da Zelenskinin İrlandiyanın Baş naziri Mixol Martinlə görüşündə Avropa inteqrasiyası və təhlükəsizlik əməkdaşlığının müzakirə olunduğunu bildirib. Rəsmi məlumata görə, İrlandiya tərəfi Ukraynanın Aİ-yə üzv olmalı olduğunu və danışıqlar klasterlərinin açılmasını dəstəklədiyini qeyd edib.
