Cənubi Koreya Ukraynadakı səfirini geri çağırmaq qərarı verib. Bu addım iki Şimali Koreya hərbi əsirinin Seula təhvil verilməsi ilə bağlı məlumatın ictimailəşdirilməsi fonunda iki ölkə arasında yaranan diplomatik gərginlikdən sonra atılıb.
MSNews.az xəbər verir ki, “Yonhap” məlumatına görə, Seul hesab edir ki, Şimali Koreya hərbi əsirlərinin Cənubi Koreyaya təhvil verilməsi barədə məlumat tərəflər arasında əldə edilmiş razılaşmaya əsasən məxfi saxlanılmalı idi.
Mübahisə Ukrayna Prezidenti Volodimir Zelenskinin BMT-də çıxışı zamanı iki Şimali Koreya hərbi əsirinin Cənubi Koreyaya göndərildiyini açıqlamasından sonra başlayıb. Bundan sonra Seul rəsmi izahat və üzr tələb edib.
Cənubi Koreya Xarici İşlər Nazirliyi bildirib ki, məsələ əsgərlərin və Şimali Koreyada qalan ailələrinin təhlükəsizliyi baxımından həssas xarakter daşıyırdı və məhz buna görə məlumatın açıqlanmaması barədə “aydın anlaşma” mövcud olub. Ukrayna tərəfi isə ilkin mərhələdə belə bir razılaşmanın olduğunu inkar edib.
Daha sonra Ukrayna tərəfi Seula üzrxahlıq mesajı göndərib. Lakin Cənubi Koreyanın xarici işlər naziri Ço Hyun bildirib ki, bu üzr Seulun gözləntilərinə tam cavab verməyib.
“Reuters” yazır ki, Seul səfirin geri çağırılmasını diplomatik təzyiq vasitəsi kimi qiymətləndirir, amma eyni zamanda Kiyevlə danışıqları davam etdirmək və mübahisəni həll etmək niyyətində olduğunu bildirir.
Məsələni daha da gərginləşdirən digər amil Cənubi Koreyadan Rusiyaya yanacaq daşınması ilə bağlı Ukrayna tərəfinin son ittihamları olub. Seul bu iddiaları rədd edib və beynəlxalq sanksiyalara əməl etdiyini bildirib.
