Türkiyənin “Daltonlar” mütəşəkkil cinayətkar qruplaşmasının Rusiya xüsusi xidmət orqanlarının sifarişi ilə Polşada “Starlink” peyk rabitəsi stansiyasının yandırılmasında iştirak etmiş ola biləcəyi bildirilir.
MSNews.az xəbər verir ki, bu barədə Almaniyanın “Der Spiegel” nəşri bir neçə Avropa ölkəsindəki müstəqil mənbələrə istinadən məlumat yayıb.
Araşdırmanın təfərrüatlarını “Euronews” də dərc edib.
Polşanın təhlükəsizlik qurumları hadisəni qəsdən törədilmiş təxribat kimi qiymətləndiriblər. Ölkənin prokurorluğu hücumun Rusiya xüsusi xidmətlərinin tapşırığı ilə həyata keçirilmiş ola biləcəyinə dair əsaslı şübhələrin mövcud olduğunu açıqlayıb.
Qruplaşma Türkiyə və Avropanın bir sıra ölkələrində hədə-qorxu ilə pul tələb etmə, silah alveri və sifarişli qətllərlə əlaqələndirilir.
Polşanın Daxili Təhlükəsizlik Agentliyinin oktyabrın 16-da yaydığı rəsmi məlumata əsasən, istintaq zamanı şübhəlilərin hərəkət marşrutları, müşahidə kameralarının görüntüləri, DNT və barmaq izi nümunələri araşdırılıb. Hər iki şəxs barəsində xarici kəşfiyyatın maraqlarına xidmət etmək və təxribat törətmək ittihamları irəli sürülüb.
