İtaliyanın Milli Gələcək (Futuro Nazionale) Partiyasının lideri, sabiq general Roberto Vannaççi Ukrayna Prezidenti Volodimir Zelenskinin Avropadan əlavə maliyyə yardımı istəməsini sərt tənqid edib. O, Zelenskinin Avropanı özünün bankomatı kimi gördüyünü bildirib.
MSNews.az xəbər verir ki, Vannaççi bu barədə oktyabrın 17-də sosial şəbəkədə paylaşdığı videoda danışıb.
Onun açıqlamasını “The Epoch Times” və “Sardegnagol” nəşrləri yayıb.
Siyasətçi Zelenskinin Avropa İttifaqından yeni maliyyə dəstəyi istəməsinə münasibət bildirərək Avropa ölkələrinin Ukraynaya milyardlarla avro ayırmasını tənqid edib.
“Zelenski Avropanı Kiyevin bankomatı ilə səhv salıb. Ukraynaya daha pul ayrılmamalıdır”, – deyə Vannaççi bildirib.
O, İtaliyanın mövcud iqtisadi çətinliklər fonunda öz vətəndaşlarının ehtiyaclarını prioritet hesab etməli olduğunu vurğulayıb.
“Bu qiymətli vəsaitlər dolanışıq çətinliyi çəkən İtaliya vətəndaşlarına yönəldilməlidir. Lakin hakim sağ-mərkəz koalisiyası pulları Kiyevdəki korrupsionerlərə verməyə üstünlük verir”, – deyə siyasətçi iddia edib.
“ANSA” agentliyinin məlumatına görə, siyasətçi əvvəlki açıqlamalarında da müharibənin diplomatik yolla başa çatdırılmasının vacibliyini vurğulayaraq İtaliyanın milli maraqlarının ön plana çəkilməsini tələb edib.
