Türkiyə Səudiyyə Ərəbistanının müdafiəsinə dəstək verə bilər, lakin Yəməndə husilərə qarşı hücum əməliyyatlarında iştirak etməyəcək. Ankara bu məqsədlə döyüş qüvvələri göndərmək niyyətində olmadığını açıqlayıb.
MSNews.az xəbər verir ki, “Reuters” Türkiyənin xarici işlər naziri Hakan Fidana istinadən yazır ki, Ankara Səudiyyə Ərəbistanının husilərin raket və PUA hücumlarından müdafiəsinə necə yardım göstərə biləcəyini qiymətləndirir.
Fidanın sözlərinə görə, Türkiyənin mümkün dəstəyi əsasən hava hücumundan müdafiə sistemləri, radioelektron mübarizə vasitələri və texniki yardım şəklində ola bilər. O, Türkiyənin hücum xarakterli əməliyyatlarda iştirak etməyəcəyini və Yəmənə döyüş tapşırığı ilə əsgər göndərməyəcəyini vurğulayıb.
Türkiyə, Səudiyyə Ərəbistanı və Pakistan avqustun 7-də Məkkədə Birgə Müdafiə Sazişi imzalayıblar. Sənədə əsasən, tərəflərdən birinə silahlı hücum hamısına qarşı hücum kimi qiymətləndirilir. Saziş müdafiə əməkdaşlığının və kollektiv çəkindirmə imkanlarının genişləndirilməsini nəzərdə tutur.
Lakin Türkiyədə sazişin tam hüquqi qüvvəyə minməsi üçün parlament proseduru hələ başa çatmayıb. Fidan oktyabrın 8-də bildirib ki, sənədin parlamentə təqdim edilməsi üçün hazırlıq demək olar yekunlaşıb. Buna görə Ankara hazırda müəyyən müdafiə və texniki dəstəyi ikitərəfli mexanizmlər əsasında göstərir.
Oktyabrın 5-də Ər-Riyadda üç ölkənin Strateji-Siyasi və Müdafiə Komitəsinin fövqəladə iclası keçirilib. Tərəflər Səudiyyə Ərəbistanına qarşı hücumları müzakirə edib və kollektiv müdafiə öhdəliklərinin praktiki icrasına keçmək barədə razılığa gəliblər. Bununla belə, hər bir ölkənin hərbi töhfəsinin öz milli qanunvericiliyinə uyğun həyata keçiriləcəyi vurğulanıb.
Son günlər husilərin Səudiyyə Ərəbistanının hava limanları və digər infrastrukturlarına raket hücumları regionda gərginliyi artırıb. Türkiyənin mövqeyi isə bu mərhələdə müdafiə dəstəyi ilə məhdudlaşır.
