Tayvan hökuməti 2027-ci il üçün müdafiə xərclərini 18 faiz artıraraq rekord həddə — 1,1225 trilyon Tayvan dollarına çatdırmağı təklif edib. Plan qəbul olunarsa, müdafiə xərcləri ilk dəfə 1 trilyon Tayvan dollarını və ÜDM-in 3 faizini keçəcək.
MSNews.az xəbər verir ki, “Reuters” hökumətin təsdiqlədiyi büdcə layihəsinə istinadən əsas investisiyaların dronlar, raketlər və ordunun modernləşdirilməsinə yönəldiləcəyini yazır. Büdcəyə Sahil Mühafizəsi və veteranlarla bağlı xərclər də daxildir.
Tayvan Prezidenti Lay Çinte bildirib ki, rekord büdcə adanın özünümüdafiə imkanlarını gücləndirmək əzmini göstərir. “Müdafiəyə sərmayə sülhə sərmayədir”, — deyə o vurğulayıb. Tayvan rəhbərliyi Çin tərəfindən artan hərbi təzyiq fonunda yerli sualtı qayıqların, pilotsuz sistemlərin və digər müasir silahların inkişafını prioritet hesab edir.
“Financial Times”-ın məlumatına görə, dronlar və digər asimmetrik döyüş imkanları üçün nəzərdə tutulan xərclərin təxminən 91 faiz artırılaraq 144,5 milyard Tayvan dollarına çatdırılması planlaşdırılır. Müdafiə Nazirliyinin büdcə idarəsinin rəhbəri Hsieh Chi-hsien əlavə dron və raket alışlarının da layihəyə daxil edildiyini bildirib.
Büdcənin qüvvəyə minməsi üçün Tayvan parlamentinin təsdiqi tələb olunur. Qanunverici orqanda çoxluğa malik müxalifət partiyaları müdafiə xərclərinin artırılmasını dəstəklədiklərini bildirsələr də, hökumətə məhdudiyyətsiz maliyyə ayrılmasına qarşı çıxırlar. May ayında parlament hökumətin tələb etdiyi əlavə müdafiə vəsaitinin yalnız təxminən üçdə ikisini təsdiqləmiş, bəzi yerli proqramlara, o cümlədən dron layihələrinə ayrılan vəsaiti qəbul etməmişdi.
Müdafiə büdcəsinin artırılması Çin ordusunun Tayvan ətrafındakı fəaliyyətinin intensivləşdiyi dövrə təsadüf edir. Çin hərbi təyyarələri və gəmiləri ada ətrafında demək olar ki, gündəlik fəaliyyət göstərir. Tayvanın Müdafiə Nazirliyi avqustun 4-də keçirilən Çin “birgə döyüş hazırlığı patrulu” zamanı 17 hərbi təyyarə və pilotsuz aparat qeydə aldığını, onlardan 12-nin Tayvan boğazının median xəttini keçdiyini açıqlayıb.
Vaşinqton da Tayvanı öz müdafiəsinə daha çox vəsait ayırmağa çağırır. Donald Tramp administrasiyası 2025-ci ilin dekabrında Tayvana 11,1 milyard dollarlıq silah satış paketini elan edib ki, bu, ada üçün indiyədək açıqlanmış ən böyük ABŞ silah paketi olub. Bununla yanaşı, təxminən 14 milyard dollarlıq daha bir paket də hazırlanıb və avqustun əvvəlində ABŞ konqresmeni Maykl Makkol onun yaxın zamanda Konqresə təqdim ediləcəyini gözlədiyini bildirib.
Pekin Tayvanı öz ərazisinin bir hissəsi hesab edir və güc tətbiqini istisna etmir. Tayvan hakimiyyəti isə Çinin suverenlik iddialarını rədd edir və adanın gələcəyinin yalnız Tayvan əhalisi tərəfindən müəyyənləşdirilə biləcəyini bildirir.
