Beynəlxalq Cinayət Məhkəməsi Əfqanıstanda “Taliban”ın ali lideri Heybətullah Axundzadə və ölkənin de-fakto baş hakimi Əbdülhəkim Həqqani barədə daha əvvəl verilmiş həbs orderlərinin təfərrüatlarını ictimailəşdirib. Onlar gender əsaslı təqib formasında bəşəriyyətə qarşı cinayətlərdə şübhəli bilinirlər.
MSNews.az xəbər verir ki, BCM-nin Məhkəməyəqədərki Palatası Axundzadə və Həqqani haqqında orderləri 8 iyul 2025-ci ildə çıxarıb. Məhkəmə onların 15 avqust 2021-ci ildən etibarən Əfqanıstanda faktiki hakimiyyət həyata keçirdiyini qeyd edir.
BCM hakimləri hesab edirlər ki, onların qadınlar, qızlar və “Taliban”ın gender siyasətinə uyğun gəlməyən digər şəxslərə qarşı sistemli təqib siyasətinin həyata keçirilməsində məsuliyyət daşıdığına inanmaq üçün “əsaslı səbəblər” var. İttihamlar Roma Statutunun 7-ci maddəsi üzrə bəşəriyyətə qarşı cinayət — təqib kateqoriyasına aiddir.
Məhkəmə materiallarında bu təqibin qətl, qanunsuz həbs, işgəncə, zorlama və məcburi yoxaçıxma kimi əməllərlə əlaqəli olduğu bildirilir. İttihamların əhatə etdiyi dövr “Taliban”ın hakimiyyətə qayıtdığı 15 avqust 2021-ci ildən ən azı 20 yanvar 2025-ci ilədək davam edir.
5 oktyabr 2026-cı ildə BCM təkcə Axundzadə və Həqqani deyil, həmçinin Həbibullah Ağa və Neda Məhəmməd Nadim barədə daha əvvəl verilmiş orderlərin də ictimailəşdirildiyini açıqlayıb. Bu son qərar yeni orderlərin verilməsi deyil, əvvəlki sənədlərin məxfilikdən çıxarılmasıdır.
“Reuters” yazır ki, “Taliban” rəhbərliyi BCM-nin yurisdiksiyasını tanımadığını və ittihamları rədd etdiyini bildirib.
Burada bir başqa məqam da vacibdir: Axundzadə və Həqqani hərbi cinayətlərə görə yox, bəşəriyyətə qarşı cinayət kateqoriyasına daxil edilən gender və siyasi əsaslı təqibə görə axtarılırlar.
