Britaniya parlamentinin deputatı və sabiq təhlükəsizlik naziri Tom Tuqendhat bəyan edib ki, Rusiya mənşəli yük təyyarələrinin Tehrana enməsi və bu vasitələrlə İrandan böyük həcmdə qızılın çıxarılması ilə bağlı məlumatlar var.
Tuqendhat bu iddianı böyük etiraz dalğası ilə sarsılan İran rejiminin “mümkün çöküşə hazırlaşması” kontekstində səsləndirib. Onun sözlərinə görə, Rusiya yük təyyarələri Tehrana silah və sursat daşıya bilər, geri dönərkən isə İranın ehtiyat qızıllarını da götürürlər. Bununla yanaşı, iddialara görə, İranın hakim elitası Qərbdə vizalar almaq üçün hərəkət edir və situasiya getdikcə daha da gərginləşir. Lakin bu bəyanatlar hələ rəsmi kəşfiyyat mənbələri və beynəlxalq media tərəfindən təsdiqlənməmişdir.
Bundan əlavə, İntellinews portalına istinadən xəbər veririk ki, “Polymarket” kimi proqnoz bazarlarında İranın ali rəhbəri Ayətullah Əli Xameneinin mövqeyini itirməsi və ya ölkəni tərk etməsi ilə bağlı ehtimalların son günlərdə artdığı bildirilir; məsələn, müəyyən bazarlarda Xameneinin bu il ərzində vəzifəsini tərk etməsi ehtimalı 30%-dən çox qiymətləndirilir.
