Rusiyada dövlət tərəfindən maliyyələşdirilən əsas media qurumları arasında büdcə vəsaitlərinin yenidən bölüşdürülməsi planlaşdırılır. 2026–2029-cu illəri əhatə edən büdcə göstəricilərinə əsasən, VGTRK, “Birinci Kanal” və “Rossiya Seqodnya” üçün maliyyələşdirmə artırılır, RT yüksək səviyyədə maliyyələşməni qoruyur, “Solovyov Live” üçün isə 2028-ci ildən büdcə vəsaiti nəzərdə tutulmur.
MSNews.az xəbər verir ki, büdcə layihəsinə əsasən, VGTRK 2026–2029-cu illərdə ümumilikdə 81,9 milyard rubl almalıdır. Bu, ildə orta hesabla 20,5 milyard rubla yaxın vəsait deməkdir. Əvvəlki büdcə göstəricilərində illik maliyyələşdirmə təxminən 17 milyard rubl səviyyəsində idi.
Konstantin Ernstin rəhbərlik etdiyi “Birinci Kanal” üçün dörd il ərzində 23,2 milyard rubl ayrılması planlaşdırılır. İllik orta göstərici 5,8 milyard rubl təşkil edir. Əvvəlki planlarda bu rəqəm təxminən 5 milyard rubl idi. Mediascope-un 2026-cı ilin ikinci rübünə dair göstəricilərində “Birinci Kanal” 7,5 faiz auditoriya payı ilə “Rossiya-1” və NTV-dən sonra üçüncü yerdə qərarlaşıb.
Dmitri Kiselyovun rəhbərlik etdiyi “Rossiya Seqodnya” üçün 2026–2029-cu illərdə 36,1 milyard rubl, yəni ildə orta hesabla 9 milyard rubldan artıq vəsait nəzərdə tutulur. Əvvəlki büdcədə illik maliyyələşmə təxminən 8,3 milyard rubl idi.
Marqarita Simonyanın rəhbərlik etdiyi RT isə ən böyük büdcə alan media strukturlarından biri olaraq qalır. RT-nin hüquqi şəxsi “TV-Novosti”yə dörd il ərzində 105,3 milyard rubl ayrılması nəzərdə tutulur. Bununla belə, 2028 və 2029-cu illərdə illik maliyyələşmənin təxminən 21 milyard rubla endirilməsi planlaşdırılır.
Ən nəzərəçarpacaq dəyişiklik “Solovyov Live” ilə bağlıdır. Kanal üçün 2026 və 2027-ci illərdə hər il 1,5 milyard rubl ayrılması nəzərdə tutulsa da, layihədə 2028-ci ildən büdcə maliyyələşdirilməsinin davam etdirilməsi nəzərdə tutulmur.
Dəyişikliklər Rusiyanın büdcə kəsirinin artdığı dövrə təsadüf edir. “Reuters”-in büdcə sənədlərinə əsaslanan məlumatına görə, hökumət 2027-ci ildə müdafiə xərclərini artırarkən sosial siyasət, təhsil və səhiyyə də daxil olmaqla bir sıra istiqamətlər üzrə xərclərin azaldılmasını planlaşdırır.
