“Polymarket” platformasında Kriştianu Ronaldunun DÇ-2026 zamanı ağlayıb-ağlamayacağı ilə bağlı açılan bazar sosial şəbəkələrdə müzakirə yaradıb.
MSNews.az xəbər verir ki, Portuqaliyanın dünya çempionatının 1/8 finalında İspaniyaya 0:1 hesabı ilə məğlub olaraq turniri tərk etməsindən sonra bir çox istifadəçi Ronaldunun emosional görüntülərinə görə “Yes” nəticəsinin qalib sayılacağını gözləyib. Lakin “Polymarket” səhifəsində hadisə üzrə təklif olunan nəticə “No” kimi göstərilib və qərar mübahisələndirilib. Platformanın öz səhifəsində bazarın “disputed” — yəni mübahisəli statusda olduğu qeyd olunur.
“Polymarket”-in qaydalarına görə, bazarın “Yes” nəticəsi ilə bağlanması üçün Ronaldonun Portuqaliya millisinin DÇ-2026 matçı zamanı üzü açıq şəkildə görünən formada göz yaşı tökməsi foto və ya video sübutlarla təsdiqlənməlidir. Qaydada “sadəcə nəm gözlər” və ya üzündəki tərin göz yaşı kimi qəbul edilmədiyi məntiqi əsas götürülür: əsas şərt üzündə aydın görünən göz yaşının olmasıdır.
Bazarın qaydalarında həmçinin ağlama halının Ronaldonun meydanda və ya ehtiyat oyunçular skamyası zonasında olduğu vaxt baş verməli olduğu göstərilir. Soyunub-geyinmə otağında və ya stadionun digər hissələrində çəkilən görüntülər nəticə üçün əsas sayılmır. Sübut kimi yalnız orijinal foto və video materiallar qəbul edilir; arxiv, montaj, süni intellektlə yaradılmış və ya səhnələşdirilmiş görüntülər nəzərə alınmır.
Maraqlıdır ki, sözügedən bazar böyük maraq doğurub. “Polymarket”-in məlumatına görə, “Will Ronaldo Cry at the World Cup?” adlı bazarda ümumi ticarət həcmi 5,7 milyon dollardan çox olub. Platforma bu bazarın iyunun 5-də açıldığını və nəticənin etibarlı foto və video sübutlar əsasında müəyyənləşdiriləcəyini bildirir.
Qərar xüsusilə Portuqaliyanın mundialdan kənar qalmasından sonra gündəmə gəlib. Azarkeşlər Ronaldonun oyundan sonra emosional göründüyünü bildirsələr də, platformanın qaydalarına əsasən, bunun qalib nəticə sayılması üçün göz yaşları aydın şəkildə görünməlidir.
Beləliklə, Ronaldo ilə bağlı emosional anlar yenidən futbol gündəminin mərkəzinə düşüb. Lakin bu dəfə müzakirə təkcə onun mundialla vidalaşması yox, həm də proqnoz bazarlarının nə qədər detallı və sərt qaydalarla işləməsi ətrafında gedir.
