“Mançester Yunayted” yeni 100 min yerlik stadion layihəsi üçün Old Trafford yaxınlığında mühüm torpaq sahəsini əldə edib.
MSNews.az xəbər verir ki, bu barədə klubun rəsmi saytı məlumat yayıb. Bildirilib ki, klub 100 min yerlik yeni stadionun tikintisi üçün tələb olunan ərazinin əsas hissəsini təmin edib.
Məlumata görə, əldə edilən 25 akrlıq sahə hazırkı Old Trafford stadionundan təxminən 350 metr şimal-qərbdə yerləşir. Torpaq sahəsi sənaye məkanları üzrə ixtisaslaşan “Indurent” şirkətindən alınıb.
“Reuters” daha əvvəl yazmışdı ki, “Mançester Yunayted” Old Trafford yaxınlığında 2 milyard funt sterlinq dəyərində yeni 100 min yerlik stadion inşa etməyi planlaşdırır. Layihə reallaşacağı təqdirdə arena Britaniyanın ən böyük stadionu olacaq.
Klub layihəni Old Trafford ərazisinin daha geniş bərpası planının mərkəzi hissəsi kimi təqdim edir. Yeni stadionun “Wembley of the North” — “Şimalın Uemblisi” kimi formalaşdırılması hədəflənir.
Bununla belə, stadionun tikintisinə başlanması və yekun açılış tarixi ilə bağlı bütün detallar hələ tam rəsmiləşdirilməyib. Layihənin növbəti mərhələsində azarkeşlər və yerli tərəflərlə məsləhətləşmələrin aparılması gözlənilir.
