Niderland futbolunun əfsanəvi simalarından biri Klarens Zedorf Braziliyanın “Korintians” klubunun yeni baş məşqçisi təyin olunub. 50 yaşlı mütəxəssis bununla da 2019-cu ildən bəri davam edən yeddiillik fasilədən sonra məşqçilik fəaliyyətinə qayıdır.
MSNews.az xəbər verir ki, Braziliya klubu oktyabrın 11-də Zedorfun təyinatını rəsmən açıqlayıb. “CNN Brasil”in məlumatına görə, niderlandlı mütəxəssislə 2027-ci ilin sonunadək müqavilə imzalanıb.
Zedorf Braziliya çempionatında ardıcıl yeddi məğlubiyyətdən sonra istefaya göndərilən Fernando Dinizi əvəzləyib. Yeni baş məşqçinin əsas vəzifəsi komandanı uğursuz nəticələrdən çıxarmaq və yüksək liqada yerini qorumaq olacaq.
Təyinatla bağlı açıqlama verən Zedorf yeni vəzifəsinin böyük məsuliyyət olduğunu bildirib və komandanın hər oyunda qələbə uğrunda mübarizə aparması üçün çalışacağını vurğulayıb.
“Globo Esporte” nəşrinin məlumatına görə, Zedorfun yeni klubunda ilk matçının oktyabrın 19-da “Vitoriya”ya qarşı keçiriləcəyi gözlənilir. Buna qədər komandanı “Palmeyras”la derbidə müvəqqəti baş məşqçi Vilyam Batista idarə edəcək.
Zedorf sonuncu dəfə 2018–2019-cu illərdə Kamerun milli komandasına rəhbərlik edib. O, 2019-cu ildə Afrika Millətlər Kubokunun 1/8 final mərhələsində mübarizəni dayandırdıqdan sonra vəzifəsindən uzaqlaşdırılıb.
Niderlandlı mütəxəssis daha əvvəl İtaliyanın “Milan”, Çinin “Şençjen” və İspaniyanın “Deportivo” klublarında da baş məşqçi işləyib.
Futbolçu kimi isə Zedorf “Ayaks”, “Real Madrid” və “Milan”la ümumilikdə dörd dəfə UEFA Çempionlar Liqasının qalibi olub. O, turniri üç fərqli klubla qazanan yeganə futbolçu kimi tarixə düşüb.
