İsveçrə Rusiyaya qarşı sanksiyaları genişləndirərək Avropa İttifaqının 20-ci sanksiyalar paketində nəzərdə tutulan əlavə tədbirləri tətbiq edib.
MSNews.az xəbər verir ki, İsveçrə Federal Şurası qərarı avqustun 19-da qəbul edib, yeni məhdudiyyətlər isə 20 avqustdan qüvvəyə minib. Aİ sözügedən sanksiyalar paketini aprelin 23-də Rusiyanın Ukraynaya qarşı müharibəsi fonunda qəbul etmişdi.
Enerji sektorunda Rusiya ilə əlaqəli mayeləşdirilmiş təbii qaz (LNG) tankerlərinə və buzqıran gəmilərə xidmət göstərilməsi, həmçinin Rusiyadakı LNG terminallarına müəyyən xidmətlərin təqdim edilməsi qadağan olunur. Rusiyaya tankerlərin satışı da yasaqlanıb. Üçüncü ölkələrə tanker satışı zamanı isə müqavilədə həmin gəminin sonradan Rusiyaya ötürülməsini qadağan edən bənd olmalıdır.
İsveçrə sanksiyalardan yayınmanın qarşısını almaq üçün Aİ-nin “Anti-Circumvention Tool” mexanizmini ilk dəfə işə salıb. Bunun nəticəsində bəzi həssas məhsulların Qırğızıstana ixracına qadağa qoyulub. Rusiyanın hərbi-texnoloji və sənaye imkanlarını gücləndirə biləcək mallara mövcud ixrac məhdudiyyətləri də genişləndirilib.
Maliyyə sektorunda Rusiyada yaradılmış kriptoaktivlərin köçürülməsi və mübadiləsinə imkan verən platformalardan istifadə qadağan edilir. Bundan əlavə, rəqəmsal rublun hazırlanmasına dəstək göstərilməsi də yeni məhdudiyyətlərə daxil edilib. Aİ bu addımları alternativ ödəniş vasitələrindən sanksiyalardan yayınmaq üçün istifadənin qarşısını almaq məqsədi ilə əsaslandırır.
Federal Şura İsveçrə şirkətlərinin əqli mülkiyyət hüquqlarını və onları Rusiyada çıxarılan sui-istifadə xarakterli məhkəmə qərarlarının təsirindən qorumağa yönəlmiş əlavə tədbirlər də qəbul edib. Bundan əvvəl, mayın 22-də İsveçrə Aİ-nin eyni paketinə uyğun olaraq daha 115 fiziki və hüquqi şəxsi sanksiya siyahısına daxil etmişdi. Hazırda Rusiya-Ukrayna müharibəsi ilə əlaqədar İsveçrədə təxminən 2 790 şəxs və qurum aktivlərin dondurulması tədbirlərinə tabedir.
