İsrailin baş naziri Binyamin Netanyahu Qəzzanın gələcəyi ilə bağlı danışarkən fələstinlilər barədə kəskin və mübahisəli ifadə işlədib. O, Qəzzada “radikallaşmanın aradan qaldırılmasının” vacib olduğunu deyərək, “onlar bu nifrəti ana südü ilə mənimsəyirlər” ifadəsini səsləndirib.
MSNews.az xəbər verir ki, Netanyahu bu fikirləri sentyabrın 30-da “Fox News” kanalında Şon Hannitiyə müsahibəsində bildirib.
Qəzzanın gələcəyi barədə danışan Netanyahu deyib:
“Qəzzada vəziyyəti radikallıqdan təmizləmək lazımdır. Onlar bu nifrəti ana südü ilə mənimsəyirlər.”
O, ardınca HƏMAS-ın məhv edilməsinin bu prosesin əsas şərti olduğunu bildirib.
Netanyahu müsahibədə həmçinin İsrailin Qəzzadakı fəaliyyətinin “müstəmləkəçi niyyətlərdən” qaynaqlanması ilə bağlı ittihamları rədd edib və mülki itkilərə görə HƏMAS-ı məsul tutub. Bu fikirlər İsrail hökumətinin müharibə ilə bağlı uzun müddətdir səsləndirdiyi mövqeyə uyğundur.
Baş nazirin “ana südü” ifadəsi yeni deyil. Netanyahu 2017-ci ildə də fələstinli hücumçular haqqında danışarkən onların israillilərə qarşı təhriki “ana südü ilə mənimsədiklərini” demişdi. Həmin vaxt onun sözləri əsasən terror hücumları və Fələstin rəhbərliyinin siyasəti kontekstində səslənmişdi.
