İranın ABŞ-nin Yaxın Şərqdəki hərbi obyektlərinə endirdiyi zərbələrin Vaşinqtona avadanlıq və infrastruktura dəymiş ziyan baxımından 13 milyard dollaradək başa gəldiyi bildirilir.
MSNews.az xəbər verir ki, “The Wall Street Journal”da CSIS eksperti Set Consun müəllifliyi ilə dərc olunan məqalədə “Epic Fury” əməliyyatının başlanmasından etibarən İranın Yaxın Şərqdə 2 mindən çox hava, raket və dron zərbəsi həyata keçirdiyi bildirilir. Hesablamaya görə, səkkiz ölkədə ABŞ ordusunun istifadə etdiyi azı 20 obyekt zərər görüb.
Müəllif ABŞ-yə məxsus avadanlıqların və hərbi obyektlərin zədələnməsindən yaranan itkiləri 13 milyard dollaradək qiymətləndirir. Məqalədə həmçinin 42-dən çox ABŞ hərbi uçuş aparatının məhv edildiyi və ya zədələndiyi, onların bir hissəsinin hücumlar zamanı aviabazalarda olduğu qeyd olunur.
Bununla belə, 42 uçuş aparatı ilə bağlı rəqəmin təqdimatında fərqli hesablamalar mövcuddur. ABŞ Konqresinin Tədqiqat Xidmətinin məlumatları əsasında “The American Legion” yazır ki, “Epic Fury” dövründə azı 42 ABŞ hərbi uçuş aparatı itirilib və ya zədələnib. Lakin bu siyahıya İran hücumları ilə yanaşı, dost atəşi, qəzalar və digər döyüş hadisələri nəticəsində sıradan çıxan texnika da daxildir. Buna görə bütün 42 aparatın birbaşa İran zərbələri nəticəsində məhv edildiyini qəti fakt kimi təqdim etmək düzgün olmaz.
ABŞ Müdafiə Nazirliyinin may ayında Konqresə təqdim etdiyi hesablamalar isə müharibənin ümumi hərbi xərcini təxminən 29 milyard dollar göstərirdi. “The Wall Street Journal” Pentaqon rəsmisinə istinadən bunun təxminən 24 milyard dollarının istifadə olunan sursatlara və zədələnmiş və ya məhv edilmiş hərbi aviasiyaya aid olduğunu yazmışdı. Həmin hesablamaya Yaxın Şərqdə zərər görən ABŞ bazalarının bütün bərpa xərcləri daxil edilməmişdi.
“WSJ”da dərc olunan son qiymətləndirmədə İranın raket və dron hücumlarının ABŞ-nin xaricdəki hərbi bazalarının hava hücumundan müdafiəsində ciddi boşluqları üzə çıxardığı bildirilir. Müəllif Vaşinqtonun xüsusilə potensial Çin və Şimali Koreya raket hücumları fonunda xaricdəki bazalarının müdafiəsini gücləndirməli olduğunu vurğulayır.
