Avropa Komissiyasının prezidenti Ursula fon der Lyayen İsrail hökumətinin işğal altındakı İordan çayının Qərb sahilində E1 yaşayış məntəqəsi layihəsi üzrə tikinti tenderləri elan etmək qərarını “qəbuledilməz” adlandırıb.
MSNews.az xəbər verir ki, fon der Lyayen avqustun 21-də açıqlamasında Avropa tərəfinin bu addıma uzun müddətdir qarşı çıxdığını bildirib. Bu barədə “Anadolu Agentliyi” məlumat yayıb.
“Bu, Qərb sahilini bölərək və Fələstin ərazilərinin coğrafi bütövlüyünü pozaraq iki dövlətli həllə zərbə vurur”, – Avropa Komissiyasının rəhbəri bildirib.
O, Aİ-nin iki dövlətli həllə əsaslanan ədalətli və davamlı sülhə sadiq qaldığını vurğulayıb.
Bundan əvvəl Kanada, Fransa, Almaniya, İtaliya, Niderland, Norveç və Böyük Britaniya liderləri də birgə bəyanat yayaraq İsraili E1 üzrə tender qərarını geri götürməyə çağırıblar. Daha sonra Avropa Komissiyası ilə yanaşı Avstraliya, Yeni Zelandiya, İsveç, Belçika, İspaniya, Avstriya və Yunanıstan da bu mövqeyə qoşulub. Bəyanatda şirkətlərə tenderlərdə iştirak etməmək çağırışı edilib və bunun hüquqi və reputasiya riskləri yarada biləcəyi bildirilib.
E1 ərazisi Şərqi Qüdsün şərqində, Maale-Adumim yaşayış məntəqəsi istiqamətində yerləşir. BMT-nin məlumatına görə, İsrail hakimiyyəti 2025-ci ildə burada 3 401 yaşayış vahidinin tikintisi planını təsdiqləyib. BMT hesab edir ki, layihənin həyata keçirilməsi Qərb sahilinin şimal və cənub hissələri arasındakı ərazi bağlantısına ciddi təsir göstərə və iki dövlətli həll perspektivini zəiflədə bilər.
BMT Təhlükəsizlik Şurasının 2334 saylı qətnaməsində İsrailin 1967-ci ildən işğal etdiyi Fələstin ərazilərində, o cümlədən Şərqi Qüdsdə yaradılan yaşayış məntəqələrinin hüquqi qüvvəsinin olmadığı bildirilir. İsrail isə Qərb sahilinin statusu ilə bağlı beynəlxalq mövqelərin bir qismini qəbul etmir.
