Özbəkistan Prezidenti Şavkat Mirziyoyev ölkəyə səfər edən ABŞ Dövlət katibi Marko Rubionu qəbul edib və onu yüksək dövlət mükafatı – “Böyük xidmətlərinə görə” ordeni ilə təltif edib. Təltifetmə mərasimi iki ölkə arasında strateji tərəfdaşlığın genişləndirilməsi istiqamətində aparılan diplomatik təmaslar çərçivəsində baş tutub.
MSNews.az xəbər verir ki, görüş oktyabrın 19-da Səmərqənd şəhərində keçirilib.
Özbəkistanın “UzReport” nəşrinin məlumatına görə, Şavkat Mirziyoyev Marko Rubionu Özbəkistan və ABŞ arasında strateji tərəfdaşlığın inkişafına verdiyi töhfələrə görə “Buyuk xizmatlari uchun” (“Böyük xidmətlərinə görə”) ordeni ilə təltif edib.
Eyni zamanda, Rubionun Mərkəzi Asiyada sülhün, sabitliyin və davamlı inkişafın dəstəklənməsi, Özbəkistanın beynəlxalq təşəbbüslərinin irəli aparılması və iki ölkə xalqları arasında dostluq münasibətlərinin möhkəmləndirilməsi istiqamətində fəaliyyətinin yüksək qiymətləndirildiyi bildirilib.
Özbəkistan lideri ABŞ Prezidentinin Cənubi və Mərkəzi Asiya üzrə xüsusi nümayəndəsi Serxio Qoru da dövlət mükafatı ilə təltif edib.
Qora ABŞ və Özbəkistan arasında dostluq münasibətlərinin inkişafına, siyasi dialoqun genişləndirilməsinə və amerikalı investorların ölkəyə cəlb edilməsinə verdiyi töhfələrə görə “Dostlik” (“Dostluq”) ordeni təqdim olunub.
ABŞ Dövlət katibinin Özbəkistana səfəri Mərkəzi Asiyanın beş ölkəsi və ABŞ arasında təşkil edilən C5+1 formatlı danışıqlarla eyni vaxta təsadüf edir.
“Reuters” agentliyinin məlumatına görə, Rubio Səmərqəndə 200-dən çox amerikalı iş adamının iştirak etdiyi nümayəndə heyəti ilə gəlib. Səfərin əsas məqsədlərindən biri ABŞ-nin Mərkəzi Asiya ilə ticarət, investisiya və strateji minerallar sahəsində əməkdaşlığını genişləndirməkdir.
ABŞ Dövlət katibi Səmərqənddə keçirilən tədbirlərdə Mərkəzi Asiya ölkələri ilə uzunmüddətli iqtisadi və diplomatik əlaqələrin qurulmasının Vaşinqton üçün əhəmiyyətini vurğulayıb.
“Euronews” nəşrinə müsahibəsində Rubio regionda Amerika şirkətlərinin iştirakı ilə yeni kommersiya razılaşmalarının hazırlanmasından danışıb.
