Danimarka Baş naziri Mette Frederiksen ABŞ-ın Qrenlandiyaya qarşı hərbi güc tətbiq edəcəyi ehtimalı ilə bağlı sərt açıqlama verib. O bildirib ki, belə bir addım atılarsa, Danimarka da güc tətbiq etməkdən çəkinməyəcək.
Kopenhagendə jurnalistlərə danışan Frederiksen ABŞ Prezidenti Donald Trampın ada ilə bağlı bəyanatlarını diqqətlə izlədiklərini deyib. Onun sözlərinə görə, Tramp Qrenlandiya ilə bağlı açıqlamalarında hərbi güc variantını istisna etmir və bu halda Danimarkanın verəcəyi cavab ABŞ prezidentinin ritorikasının təbii nəticəsi olacaq.
Frederiksen eyni zamanda Qrenlandiyada hərbi təlimlərin və mövcudluğun artırıldığını açıqlayıb. O vurğulayıb ki, bu proses NATOnun Arktik Dayanıqlılıq Əməliyyatı çərçivəsində həyata keçirilir və bölgədə təhlükəsizliyin gücləndirilməsinə yönəlib.
Məsələ Trampın Qrenlandiya ilə bağlı son açıqlamalarından sonra daha da gərginləşib. ABŞ prezidenti adanın ABŞ üçün milli təhlükəsizlik baxımından vacib olduğunu, xüsusilə də “Qızıl Qübbə” adlı müdafiə sisteminin qurulması üçün həyati əhəmiyyət daşıdığını bildirmişdi. Vaşinqtonda ABŞ, Danimarka və Qrenlandiya xarici işlər nazirlərinin görüşündən sonra da əsas fikir ayrılıqlarının davam etdiyi və ABŞ-ın ada üzərində nəzarət istəklərinin açıq olduğu qeyd olunmuşdu.
Danimarka Krallığının tərkibində muxtar statusa malik Qrenlandiya daha əvvəl ABŞ-dan gələn və suverenliyin ötürülməsini ehtiva edən təklifləri qəti şəkildə rədd etmişdi. Son aylarda isə Danimarka Avropa müttəfiqləri ilə birlikdə bölgədə hərbi əməkdaşlığın artırılmasına çağırış edib və bir sıra Avropa ölkələri adaya kiçik hərbi birliklər göndərəcəklərini açıqlayıblar.
Buna cavab olaraq Tramp Qrenlandiya məsələsində ABŞ-a qarşı mövqe tutduqları üçün Danimarka da daxil olmaqla səkkiz Avropa ölkəsinə qarşı ticarət rüsumları tətbiq edəcəyini bildirib. O açıqlayıb ki, fevralın 1-dən etibarən bu ölkələr üçün 10 faiz, iyunun 1-dən sonra isə 25 faiz gömrük rüsumu qüvvəyə minəcək və bu qərar adanın ABŞ tərəfindən tam alınması ilə bağlı razılaşma əldə edilənə qədər dəyişməyəcək.
