MSNews.az xəbər verir ki, ABŞ ölkənin müstəqilliyinin 250 illiyi münasibətilə məhdud sayda xüsusi yubiley pasportu buraxmağa hazırlaşır.
ABŞ Dövlət Departamenti rəsmi saytında bildirib ki, xüsusi buraxılış pasportu 2026-cı il iyulun 6-dan etibarən Vaşinqton Pasport Agentliyində veriləcək. Sənəd adi ABŞ pasportu kimi 28 səhifədən ibarət olacaq və mövcud təhlükəsizlik xüsusiyyətlərini qoruyacaq. Pasport poçtla, onlayn müraciət zamanı və ya ABŞ-ın xaricdəki səfirlik və konsulluqları vasitəsilə verilən müraciətlərə şamil edilməyəcək.
“Reuters” agentliyinin məlumatına görə, Dövlət Departamenti tərəfindən təqdim olunan ilkin görüntülərdə pasportun daxili səhifələrindən birində ABŞ Prezidenti Donald Trampın portreti və imzası yer alıb. Qarşı səhifədə isə 1776-cı ildə Müstəqillik Bəyannaməsinin imzalanmasını əks etdirən təsvirin yerləşdirilməsi nəzərdə tutulub.
“Associated Press” yazır ki, bu addım Trampı ABŞ pasportunda təsviri yer alan ilk sağ prezident edə bilər. Agentlik sənədin ABŞ-ın 250 illik yubiley tədbirləri çərçivəsində hazırlanmış məhdud buraxılış olduğunu qeyd edir.
“The Guardian” nəşrinin məlumatına görə, Ağ Ev sonradan pasportun yeni görüntülərini də təqdim edib. Tramp sosial media paylaşımında sənədi “ABŞ-ın yeni pasportu” kimi təqdim edərək “Welcome, but be good!” ifadəsini işlədib. Bununla belə, Dövlət Departamentinin rəsmi açıqlamasında bu cümlənin pasportun daxilində ayrıca mesaj kimi çap olunacağı göstərilmir.
Qeyd edək ki, xüsusi pasport ABŞ vətəndaşları üçün nəzərdə tutulub və standart pasport kimi beynəlxalq səyahət sənədi funksiyasını daşıyacaq. Məhdud buraxılış yalnız müəyyən müraciət üsulları ilə əldə edilə biləcək və ehtiyatlar bitənədək veriləcək.
