Rusiyanın İrana raket tədarük etdiyi bildirilir. ABŞ və İsrailin aylarla davam edən hərbi zərbələrinə baxmayaraq, Tehran raket və pilotsuz uçuş aparatlarının istehsalı imkanlarını qoruyub saxlayıb və hərbi arsenalını bərpa etməyə davam edir.
MSNews.az xəbər verir ki, “Bloomberg” agentliyinin Qərb rəsmilərinə istinadən yaydığı məlumata görə, Rusiya İrana raket tədarük edir. Mənbələrdən biri Moskvanın Tehranın silah ehtiyatlarının bərpasına kömək etdiyini bildirib. Bununla belə, tədarük edilən raketlərin növü, sayı və çatdırılma tarixləri açıqlanmayıb.
Agentliyin məlumatına əsasən, ABŞ və İsrailin uzunmüddətli bombardmanlarına baxmayaraq, İran raket və dron istehsal edən müəssisələrinin bir hissəsini fəaliyyətdə saxlaya bilib. Qərb rəsmilərinin qiymətləndirməsinə görə, Tehran hərbi əməliyyatların intensivliyinin azalmasından silah ehtiyatlarını artırmaq üçün istifadə edir.
Mənbələr bildirirlər ki, İranın arsenalında hələ də əhəmiyyətli sayda ballistik və gəmi əleyhinə raket mövcuddur. Ölkənin əlavə silah istehsalını qısa müddətdə genişləndirmək imkanına malik olduğu da qeyd edilir.
“South China Morning Post” nəşrinin iyun ayında “Bloomberg”ə istinadən yaydığı məlumatda da İranın səkkiz həftəlik atəşkəs dövründə arsenalını əhəmiyyətli dərəcədə bərpa etdiyi bildirilmişdi. Kəşfiyyat qiymətləndirmələrinə əsasən, həmin vaxt İran müharibədən əvvəlki raket ehtiyatlarının təxminən 75 faizinə malik idi. Arsenalın Rusiya istehsalı olan raketlərlə də gücləndirildiyi ehtimal edilirdi.
Yeni məlumatlar ABŞ Prezidenti Donald Tramp administrasiyasının İranın hərbi imkanlarının ciddi şəkildə zəiflədilməsi barədə əvvəlki bəyanatları ilə ziddiyyət təşkil edir. Qərb rəsmilərinin qiymətləndirməsi Tehranın hələ də regiondakı ABŞ hərbi obyektləri və müttəfiqləri üçün təhlükə yaratmaq potensialını saxladığını göstərir.
Rusiya Müdafiə Nazirliyi isə raket tədarükü barədə “Bloomberg”in sorğusuna cavab verməyib. Tədarükün faktiki miqyası müstəqil şəkildə təsdiqlənməyib.
