Türkiyə Qara dənizdə təbii qaz hasilatını ikiqat artırmaq məqsədilə ölkənin ilk üzən hasilat platforması olan “Osman Qazi”ni istismar olunacağı əraziyə yola salıb. Nəhəng platformanın istifadəyə verilməsi ilə gündəlik qaz hasilatının 20 milyon kubmetrə çatdırılması nəzərdə tutulur.
MSNews.az xəbər verir ki, platformanın yola salınması mərasimi oktyabrın 17-də Zonquldak vilayətinin Filyos limanında keçirilib. Türkiyə Prezidenti Rəcəb Tayyib Ərdoğan tədbir iştirakçılarına videomüraciət ünvanlayaraq layihənin ölkənin enerji təhlükəsizliyi baxımından əhəmiyyətini vurğulayıb.
Bu barədə “Anadolu Agentliyi” məlumat yayıb.
Türkiyə lideri platformanı “üzən enerji qalası” adlandıraraq onun ölkənin dənizlərdə həyata keçirdiyi “Mavi Vətən” konsepsiyasının mühüm tərkib hissəsi olduğunu qeyd edib.
Uzunluğu 298,5 metr, eni 56 metr, gövdəsinin hündürlüyü isə 29,5 metr olan platformada 140 mütəxəssis fəaliyyət göstərəcək.
“Osman Qazi” üzərində yerləşdirilən 21 texnoloji qurğu vasitəsilə Sakarya qaz yatağından çıxarılan təbii qazı emal edəcək. Emal olunmuş qaz daha sonra dənizin dibindən keçən boru kəmərləri ilə Filyosdakı sahil infrastrukturuna ötürüləcək.
Nazirin sözlərinə görə, bununla yerli təbii qazla təmin olunan ev təsərrüfatlarının sayının 4 milyondan 8 milyona yüksəldilməsi hədəflənir.
Türkiyə Prezident Administrasiyasının Kommunikasiya İdarəsi isə platformanın Qara dənizdə 20 il fəaliyyət göstərməsinin nəzərdə tutulduğunu açıqlayıb. Rəsmi hesablamalara əsasən, layihənin ölkə iqtisadiyyatına illik 3,5 milyard dollar töhfə verməsi gözlənilir.
Qeyd edək ki, Türkiyə hökuməti 2024-cü ilin iyulunda ilk üzən hasilat platformasının alınacağını elan edib. “Osman Qazi” 2025-ci ilin mayında İstanbuldan Filyos limanına gətirilib və burada istismara hazırlanıb.
Platformanın Qara dənizdə fəaliyyətə başlaması Türkiyənin enerji sektorunda yeni mərhələ hesab olunur. Bununla belə, gündəlik 20 milyon kubmetrlik hasilat hələ əldə olunmuş nəticə deyil, 2027-ci il üçün müəyyənləşdirilmiş hədəfdir.
