Afrika ölkələri Rusiya ordusunun tərkibində Ukraynaya qarşı döyüşərkən əsir düşən vətəndaşlarının geri qaytarılması üçün diplomatik səylərini gücləndirirlər. Bəzi ölkələr həmin şəxslərin aldadılaraq müharibəyə cəlb edildiyini bildirir və onların insan alverinin qurbanları kimi tanınmasını istəyir.
MSNews.az xəbər verir ki, “Ukrainska Pravda” nəşrinin “Bloomberg” agentliyinə istinadən yaydığı məlumata görə, Ukrayna hakimiyyəti Rusiyanın dünyanın 135 ölkəsindən 28 mindən çox xarici vətəndaşı müharibəyə cəlb etdiyini bildirir. Ukrayna tərəfinin hesablamalarına əsasən, onlardan 5 mindən çoxu həlak olub, 51 ölkənin vətəndaşları isə əsir götürülüb. Bu rəqəmlər müstəqil şəkildə tam təsdiqlənməyib.
Hazırda Ukraynada Rusiya və Şimali Koreya vətəndaşları istisna olmaqla, azı 213 xarici hərbi əsirin saxlanıldığı bildirilir. Onlardan 37-si Afrika ölkələrinin vətəndaşlarıdır.
Keniya hökuməti əsirlikdə olan beş vətəndaşının azad edilməsi üçün Ukrayna ilə danışıqlar aparır. Ölkənin xarici işlər naziri Musaliya Mudavadi bildirib ki, Prezident Uilyam Ruto məsələni şəxsən Ukrayna Prezidenti Volodimir Zelenski ilə telefon danışığında müzakirə edib. Bu məlumat Keniya parlamentinin rəsmi açıqlamasında da təsdiqlənib.
“Anadolu Agentliyi”nin məlumatına görə, Keniya hakimiyyəti müharibəyə cəlb edilmiş 354 vətəndaşını qeydə alıb. Onlardan 84-ü həlak olmuş və ya itkin düşmüş hesab edilir, 62 nəfər isə artıq ölkəsinə qaytarılıb.
Botsvana da Ukraynada əsir saxlanılan bir vətəndaşının geri qaytarılmasına çalışır.
Məsələnin əsas mübahisəli tərəfi xarici vətəndaşların müharibəyə cəlb edilmə şəraitidir. Afrika hökumətlərinin məlumatına görə, bəzi şəxslərə Rusiyada sürücü, mühafizəçi və aşpaz kimi mülki işlər vəd edilsə də, sonradan onlar döyüş bölgələrinə göndərilib.
Keniya hökuməti bu şəxslərin hərbi əsir deyil, beynəlxalq insan alverinin qurbanları kimi qiymətləndirilməsini istəyir.
Rusiya tərəfi isə xarici vətəndaşların sistemli şəkildə aldadılaraq cəbhəyə göndərilməsi ilə bağlı ittihamları qəbul etməyib. Moskva daha əvvəl xarici vətəndaşların Rusiya ordusu ilə könüllü müqavilə bağladıqlarını bildirib. “Reuters”in məlumatına görə, mart ayında Rusiya və Keniya arasında Keniya vətəndaşlarının Rusiya Müdafiə Nazirliyi vasitəsilə hərbi xidmətə cəlbinin dayandırılması barədə razılıq əldə olunub.
Ukrayna isə həmin şəxsləri hərbi əsir hesab edir və onların qaytarılmasının Rusiyada saxlanılan ukraynalı əsirlərlə mübadilə çərçivəsində mümkün olduğunu bildirir.
