ABŞ Prezidenti Donald Tramp sosial media hesabında İrana qarşı hərbi üstünlük mesajı verən bir sıra vizual paylaşımlar edib. Paylaşımlarda ABŞ hərbi gücü, İran dronlarının vurulması və İran donanmasının zərərsizləşdirilməsi mövzuları simvolik şəkildə təqdim olunub. Tramp “Truth Social” hesabında İranla bağlı süni intellektlə hazırlanmış hərbi təsvirlər və golf turnirindən fotolar daxil olmaqla qısa müddətdə ondan çox paylaşım edib.
MSNews.az xəbəri “The Independent”-ə istinadən verir.
Paylaşımlardan birində üzərində İran bayrağı olan dronların dənizə düşdüyü görünür. Tramp bu vizualı “Dronlar kəpənəklər kimi düşür” məzmunlu ifadə ilə təqdim edib. Daha sonra o, ABŞ hərbi gəmisinin səmadakı dronları lazer şüalarına bənzər silahlarla məhv etdiyi başqa bir AI təsviri paylaşıb və görüntüyə “Bye Bye, Drones” başlığını əlavə edib.
Digər paylaşımda isə “Obama/Bayden” dövrü ilə “Tramp” dövrü müqayisə edilib. Şəklin sol tərəfində İran bayraqları daşıyan çoxsaylı gəmi suyun üzərində hərəkət edən donanma kimi göstərilir, sağ tərəfdə isə eyni gəmilər dənizin dibində batmış vəziyyətdə təsvir olunur. Bu kompozisiya Trampın öz administrasiyası dövründə İranın hərbi-dəniz imkanlarının zərərsizləşdirildiyi mesajını verməyə hesablanmış siyasi vizual kimi qiymətləndirilir.
Paylaşımlar ABŞ və İran arasında Hörmüz boğazı ətrafında gərginliyin davam etdiyi vaxta təsadüf edib. “CBS News”-un məlumatına görə, Tramp daha əvvəl üç ABŞ esminesinin Hörmüz boğazından zərər görmədən keçdiyini, İran tərəfinin isə “böyük zərər” aldığını bildirmişdi. ABŞ Mərkəzi Komandanlığı da İran raketləri, dronları və kiçik qayıqları ilə hücumdan sonra ABŞ qüvvələrinin özünümüdafiə zərbələri endirdiyini açıqlamışdı.
Bununla belə, Trampın paylaşdığı görüntülər real döyüş kadrları kimi deyil, süni intellektlə hazırlanmış siyasi-təbliğat xarakterli vizuallar kimi təqdim olunur. Onların əsas məqsədi ABŞ ictimaiyyətinə və xarici auditoriyaya Vaşinqtonun İran qarşısında hərbi üstünlük nümayiş etdirdiyi mesajını çatdırmaqdır.
