“Bavariya”nın və Almaniya millisinin futbolçusu Camal Musiala son günlər meydanda baş verən huş və şüur itkisinə bənzər epizodların səbəbini açıqlayıb. 23 yaşlı yarımmüdafiəçi onda qısamüddətli və müalicə oluna bilən absens epizodları müəyyən edildiyini bildirib.
MSNews.az xəbər verir ki, Musiala sosial şəbəkədə paylaşdığı açıqlamada vəziyyətinin nevroloji disfunksiya ilə əlaqəli olduğunu qeyd edib. Futbolçu ilk növbədə azarkeşləri sakitləşdirərək səhhətinin yaxşı olduğunu və hazırda yüksək səviyyəli tibbi nəzarət altında qaldığını bildirib.
Bu barədə “Welt” və “talkSPORT” məlumat yayıb.
Musialanın sözlərinə görə, sözügedən absenslər qısa müddət davam edir, müalicəyə yaxşı cavab verir və son olaraq “Leypsiq” və “Haydenhaym”la oyunlarda yaşanan hadisələrə səbəb ola bilər. O, görüntülərin kənardan qorxuducu görünə biləcəyini, lakin hazırda bu vəziyyətlə gündəlik həyatını davam etdirdiyini bildirib.
Musiala mütəxəssislərlə məsləhətləşdikdən sonra futbol oynamağa davam etmək qərarı verdiyini də açıqlayıb. Onun sözlərinə görə, nevroloqlar bunun üçün tibbi razılıq veriblər və əlavə sağlamlıq riskinin olmadığı bildirilib. Futbolçu “Bavariya”nın, ailəsinin və yaxınlarının ona dəstək göstərdiyini vurğulayıb.
Musiala son günlər iki dəfə meydanda yıxılıb. İlk hadisə “RB Leypsiq”lə hazırlıq matçında, ikincisi isə “Haydenhaym” üzərində 4:2 hesablı qələbə zamanı baş verib. İkinci epizodda tibbi heyət dərhal müdaxilə edib, futbolçu daha sonra öz ayaqları ilə meydanı tərk edə bilib.
Qeyd edək ki, Musiala iyulda ötən il aldığı ağır ayaq zədəsinin müalicəsi çərçivəsində əvvəlcədən planlaşdırılmış kiçik əməliyyat da keçirmişdi. “Bavariya” həmin prosedurun onun əvvəlki zədəsi ilə bağlı standart tibbi prosesin bir hissəsi olduğunu açıqlamışdı.
