Almaniya Bundestaqı Ukraynaya əlavə hərbi və humanitar dəstəyin artırılmasını nəzərdə tutan qətnamə layihəsini rədd edib.
MSNews.az xəbər verir ki, Almaniya parlamentinin rəsmi məlumatına əsasən, iyulun 8-də “Bündnis 90/Die Grünen” — “Yaşıllar” fraksiyasının təqdim etdiyi sənəd üzrə adlı səsvermə keçirilib. Səsvermədə ümumilikdə 590 deputat iştirak edib: 79 deputat qətnamənin lehinə, 510 deputat isə əleyhinə səs verib, 1 deputat bitərəf qalıb.
Qətnamə “Rusiyanın Ukraynaya qarşı müharibəsini dayandırmaq — Ukraynanı indi əlavə hərbi və humanitar olaraq gücləndirmək” adlanırdı. Sənəddə Almaniya hökumətindən Ukraynaya maliyyə, diplomatik, humanitar və hərbi dəstəyin artırılması tələb olunurdu.
Layihənin əsas bəndlərindən biri Ukraynaya Bundesverin mövcud ehtiyatlarından “Taurus” qanadlı raketlərinin “dərhal və mümkün olan ən geniş həcmdə” verilməsi idi. Sənəddə Almaniya hökumətinin bu raketlərin tədarükü ilə bağlı “bloklayıcı mövqedən” imtina etməli olduğu qeyd olunurdu.
Qətnamədə həmçinin Ukraynanın Rusiya ərazisinin dərinliyində yerləşən komanda məntəqələri, buraxılış qurğuları, hərbi aerodromlar, sursat anbarları, yanacaq bazaları və hərbi istehsal obyektlərini vurmaq imkanlarının genişləndirilməsi təklif edilirdi.
Bundan başqa, sənəddə Ukraynanın müdafiə dronları və uzaqmənzilli imkanlarının istehsal gücünün əlavə maliyyə ilə artırılması, Almaniyada Ukrayna üçün “Patriot” PAC-2 raketlərinin əlavə istehsalının sifariş edilməsi, eləcə də Rusiyaya qarşı sanksiyaların daha sərt tətbiqi nəzərdə tutulurdu.
Bundestaqın rəsmi məlumatına görə, “Yaşıllar” qətnaməni Rusiyanın Ukraynanın mülki obyektlərinə kütləvi hava hücumlarını artırması ilə əsaslandırıb. Sənəddə Ukraynanın hava hücumundan müdafiəsinin gücləndirilməsinin və enerji infrastrukturunun qorunmasının vacibliyi vurğulanırdı.
Beləliklə, Almaniya parlamenti Ukraynaya “Taurus” raketlərinin verilməsi və hərbi dəstəyin daha da genişləndirilməsi ilə bağlı növbəti təşəbbüsü qəbul etməyib. Qərar Berlinin Kiyevə dəstəyin artırılması məsələsində ehtiyatlı mövqeyinin hələ də davam etdiyini göstərir.
