NATO Baş katibi Mark Rütte Alyansın İrana qarşı ABŞ əməliyyatlarında birbaşa iştirak etmədiyini, lakin İranın nüvə silahı və ballistik raket imkanlarına sahib olmamasının NATO-nun siyasi mövqeyi olduğunu bildirib.
MSNews.az xəbər verir ki, Rütte Ankarada keçirilən sammitdən sonra mətbuat konfransında İranla bağlı sualı cavablandırarkən deyib ki, İran NATO ərazisindən kənardadır və hazırkı əməliyyatlarda NATO özü iştirak etmir. Bununla belə, o qeyd edib ki, “faydalı olarsa, NATO hər zaman rol oynamağa hazırdır”.
Rütte vurğulayıb ki, Alyansın siyasi mövqeyi aydındır: İran nüvə silahı əldə etməməli, ballistik raket potensialını genişləndirməməli, Hörmüz boğazı isə açıq qalmalıdır. Onun sözlərinə görə, bu məsələlər NATO-nun Ankara sammitinin yekun bəyannaməsində də əks olunub.
Rütte ABŞ-ın İrana yeni zərbələrini “tamamilə zəruri” adlandırıb. O bildirib ki, İran atəşkəsi pozduğu halda ABŞ-ın sərt cavab verməsi “həlledici əhəmiyyət” daşıyır.
Bununla belə, Rütte NATO-nun birbaşa hərbi iştirakından danışarkən daha ehtiyatlı mövqe nümayiş etdirib. NATO-nun rəsmi transkriptinə əsasən, o, İran məsələsində praktiki səviyyədə ABŞ-la ayrı-ayrı Avropa müttəfiqləri arasında ikitərəfli razılaşmaların mövcud olduğunu bildirib. Rütte qeyd edib ki, Avropadakı bazalardan ABŞ əməliyyatları üçün istifadə edilməsi NATO-nun kollektiv əməliyyatı deyil, ayrı-ayrı müttəfiqlərin Vaşinqtonla razılaşmaları çərçivəsində baş verir.
Baş katib həmçinin ABŞ-ın regiondakı əməliyyatlarının Ukraynaya dəstəyi zəiflədib-zəiflətməyəcəyi ilə bağlı suala cavabında Vaşinqtonun “hər iki istiqamətdə” fəaliyyət göstərə biləcək gücə malik olduğunu deyib. Rütte İranın nüvə və ballistik raket imkanlarının zəiflədilməsini Yaxın Şərq, Avropa və bütövlükdə dünya təhlükəsizliyi üçün vacib adlandırıb.
Beləliklə, Rütte NATO-nun İrana qarşı müharibəyə birbaşa qoşulacağını elan etməyib. Onun açıqlaması Alyansın ABŞ-ın mövqeyini siyasi baxımdan dəstəklədiyini, lakin əməliyyatların hazırda NATO çərçivəsində deyil, ABŞ və ayrı-ayrı müttəfiqlərin ikitərəfli mexanizmləri əsasında aparıldığını göstərir.
