ABŞ Prezidenti Donald Tramp Ankarada keçirilən NATO sammiti çərçivəsində Ukrayna Prezidenti Volodimir Zelenski ilə görüşüb.
MSNews.az xəbər verir ki, Ukrayna Prezidentinin rəsmi saytında yayılan məlumata əsasən, tərəflər Ukraynanın mövqelərini gücləndirə və sülhü yaxınlaşdıra biləcək ideyaları müzakirə ediblər. Zelenski ABŞ liderinə Ukraynanın hava hücumundan müdafiəsinin gücləndirilməsinə göstərdiyi diqqətə görə təşəkkür edib.
Tramp görüş zamanı ABŞ-ın Ukraynaya “Patriot” raket-tutucularını istehsal etmək üçün lisenziya verəcəyini açıqlayıb. O bildirib ki, “Patriot” müdafiə silahıdır və Ukrayna bu sistemlərin istehsalına nisbətən qısa müddətdə başlaya bilər.
ABŞ lideri eyni zamanda Vaşinqtonun dərhal müəyyən sayda “Patriot” raket-tutucusu göndərə biləcəyini də istisna etməyib. Bununla belə, Tramp ABŞ-ın öz ehtiyatlarının da məhdud olduğunu vurğulayıb. “Reuters” yazır ki, “Patriot” raket-tutucularının əsas istehsalçısı “Lockheed Martin” şirkətidir. (Reuters)
Tramp Zelenskini müharibədə “çox effektiv” fəaliyyət göstərən lider kimi xarakterizə edib və Ukraynanın pilotsuz uçuş aparatları sahəsində imkanlarını yüksək qiymətləndirib. ABŞ Prezidenti Vaşinqtonun gələcəkdə Ukrayna istehsalı olan dronları ala biləcəyini də bildirib.
Görüş zamanı Rusiya-Ukrayna müharibəsinin diplomatik həlli də gündəmdə olub. “Reuters” qeyd edir ki, Tramp həm Moskvanın, həm də Kiyevin müharibənin bitməsini istədiyini deyib, lakin həm Vladimir Putini, həm də Zelenskini “çətin” fiqurlar adlandırıb.
Tramp Putin və Zelenski arasında mümkün görüşdən danışarkən Rusiya liderinin Moskvanı ev sahibi kimi təklif etdiyini bildirib. Trampın Zelenskiyə “Moskvaya gedərdinizmi?” sualına Ukrayna Prezidenti zarafatla “çətindir, orada çoxlu Ukrayna dronu var, təhlükəlidir” cavabını verib.
Trampın İranla bağlı açıqlamaları isə görüşdən ayrıca gündəm kimi diqqət çəkib. “Associated Press”in məlumatına görə, ABŞ Prezidenti İranın Xarq adası və mülki infrastruktur obyektlərinə mümkün zərbələri nəzərdən keçirdiyini deyib. Bu açıqlama Vaşinqton və Tehran arasında atəşkəsin faktiki olaraq pozulması fonunda səslənib.
