Yaponiya Futbol Assosiasiyası — JFA məşhur futbol animesi və manqası “Blue Lock”dan ilhamlanan yeni istedad proqramına start verib.
Layihə JFA x SCO GROUP “FUTURE CAMP” inspired by BLUE LOCK adlanır və xaricdə yaşayan, yapon köklərinə malik gənc futbolçuların aşkarlanmasını hədəfləyir. JFA-nın məlumatına görə, seçim prosesi xaricdə yaşayan istedadlı oyunçuları tapmaq və Yaponiya futbolunun daha da gücləndirilməsinə töhfə vermək məqsədi daşıyır.
İlk “FUTURE CAMP” 2026-cı il avqustun 3-dən 6-dək ABŞ-ın Kaliforniya ştatında, İrvayn şəhərindəki “Orange County Great Park” meydanında keçiriləcək. Proqrama 2010-cu il yanvarın 1-i ilə 2011-ci il dekabrın 31-i arasında doğulan U-16 yaş qrupundan futbolçular müraciət edə biləcəklər. İştirak şərtlərinə əsasən, namizəd Yaponiya vətəndaşı olmalı, valideynlərindən ən azı biri Yaponiya vətəndaşı olmalı və ya gələcəkdə Yaponiya vətəndaşlığı almaq ehtimalına malik olmalıdır.
Düşərgəyə 25 iştirakçının seçilməsi planlaşdırılır. Proqram çərçivəsində JFA məşqçilərinin rəhbərliyi altında seçim məşqləri, yoxlama oyunları və fiziki göstəricilərin ölçülməsi aparılacaq. Seçim haqqı, qalma xərcləri və yerli nəqliyyat təşkilatçılar tərəfindən qarşılanacaq, lakin iştirakçıların yaşadıqları yerdən yerli hava limanına gediş-gəliş xərcləri öz hesablarına olacaq.
JFA layihənin tanıdılması və futbolçuların motivasiyasını artırmaq üçün “Blue Lock” anime layihəsi ilə əməkdaşlıq edəcəyini açıqlayıb. Yapon mətbuatının yazdığına görə, proqram mahiyyət etibarilə Yaponiyada mövcud olan milli seçim sisteminin xarici versiyası kimi nəzərdə tutulur və gələcəkdə Yaponiya futbolunun ən yüksək səviyyəsində çıxış edə biləcək oyunçuların tapılmasına yönəlib.
“Blue Lock” manqasının müəllifi Muneyuki Kaneşiro layihəni dəstəkləyib və “real Blue Lock”un başlanmaq üzrə olduğunu bildirib. O qeyd edib ki, bu təşəbbüs “Blue Lock”u da aşan istedad axtarışı meydanına çevrilə bilər və dünya çempionluğunu hədəfləyən “əsl eqoistləri” gözlədiklərini deyib.
