Monqolustan millisi tarixində ilk dəfə “PDC World Cup of Darts” turnirində iştirak edəcək. “Dartsnews”-un məlumatına görə, Monqolustan komandası Asiya Turu üzrə seçmə mərhələdən keçərək iyunda Frankfurtda keçiriləcək nüfuzlu yarışa vəsiqə qazanıb. Komandanı turnirdə Qanzoriq Lxaqvasuren və Altantulxuur Myaqmarsuren təmsil edəcək.
Seçmə mərhələdə Monqolustan həlledici oyunda Malayziyanı 4:2 hesabı ilə məğlub edib. Komanda Çin Taypeyi ilə eyni göstəriciyə malik olsa da, daha yaxşı leq fərqinə görə qrupda üstün mövqe tutub və Dünya Kubokuna vəsiqəni təmin edib.
2026-cı il BetVictor World Cup of Darts turniri 11-14 iyun tarixlərində Almaniyanın Frankfurt şəhərindəki Eissporthalle arenasında keçiriləcək. Yarışda 40 ölkədən ibarət iki nəfərlik komandalar iştirak edəcək və bütün oyunlar cütlüklər formatında oynanılacaq.
Turnirin ümumi mükafat fondu 500 min funt sterlinq təşkil edir. PDC Europe-un məlumatına görə, qalib komanda 100 min funt sterlinq qazanacaq. Bu, Monqolustan üçün təkcə idman nəticəsi deyil, həm də dartsın Asiyada genişlənməsi baxımından tarixi addım kimi qiymətləndirilir.
