ABŞ Prezidenti Donald Tramp İranla əldə olunmuş iki həftəlik kövrək atəşkəsdən sonra Hörmüz boğazının təhlükəsizliyinin İranla birgə model əsasında təmin oluna biləcəyini bildirib.
“ABC News”-un canlı yeniləməsinə görə, Tramp deyib ki, ABŞ İranla boğazın qorunması üçün “joint venture”, yəni birgə müəssisə formatını nəzərdən keçirə bilər. Onun sözləri ilə, bu, həm təhlükəsizliyi təmin etməyin, həm də “başqa qüvvələrdən” qorumağın yolu ola bilər.
“ABC News”-un yaydığı sitata əsasən, Trampdan Tehrana boğazdan keçən gəmilərə rüsum tətbiq etməyə icazə verib-verməyəcəyi soruşulanda o, “Biz bunu bir növ birgə müəssisə kimi etməyi düşünürük… Bu, gözəl bir şeydir” cavabını verib.
“Reuters” ayrıca yazır ki, Tramp həmin gün ABŞ-ın Hörmüz boğazında yığılıb qalmış gəmi trafikinin aradan qaldırılmasına kömək edəcəyini bildirib. Agentliyin məlumatına görə, Vaşinqtonun İranla iki həftəlik fasiləyə razılığı Tehranın neft və qaz daşımalarına tətbiq etdiyi blokadanı dayandırması şərti ilə bağlanıb.
Danışıqların növbəti mərhələsi ilə bağlı da mesaj verilib. ABŞ-İran təmaslarının cümə günü başlaması və sürətlə irəliləməsi gözlənilir. Eyni zamanda o, daha sonra sosial şəbəkədə yazaraq bildirib ki, danışıqlar qapalı qapılar arxasında aparılacaq və ABŞ üçün yalnız bir qrup “əhəmiyyətli məqam” məqbuldur.
Bununla yanaşı, Hörmüz boğazı üzərindən keçidə görə rüsum məsələsi hələ də mübahisəlidir. İran bu məsələni mümkün yeni gəlir mənbəyi kimi görür, ABŞ və İsrail isə bunu təxribat və təzyiq aləti kimi qiymətləndirir. İranın gəmilərdən keçid haqqı alması planı beynəlxalq hüquq və sərbəst naviqasiya prinsipləri baxımından ciddi suallar doğurur.
