İranın Tehran ostanında təhlükəsizliyə cavabdeh əsas SEPAH birləşmələrindən biri olan “Məhəmməd Rəsulullah” korpusunun komandanı, briqada generalı Həsən Həsənzadənin öldürüldüyü barədə iddialar yayılıb.
Lakin hazırda bu məlumatı təsdiqləyən etibarlı rəsmi açıqlama və ya güclü beynəlxalq agentlik xəbəri görünmür.
Açıq mənbələrdə Həsənzadənin hələ bu ay aktiv fiqur kimi keçdiyi materiallar da var. “İran International” fevralın 24-də onun Tehranın SEPAH komandanı kimi çıxış etdiyini yazıb. Eyni zamanda müxtəlif analitik və sanksiya sənədlərində də o, “Məhəmməd Rəsulullah” korpusunun rəhbəri və Tehran üzrə əsas təhlükəsizlik fiqurlarından biri kimi göstərilir.
Həsən Həsənzadə doğrudan da İranın daxili repressiya və təhlükəsizlik sistemində önəmli fiqur sayılır. ABŞ Xəzinədarlığı onu hələ 2022-ci ildə Tehran üzrə SEPAH qüvvələrinin komandanı kimi sanksiya siyahısına salmışdı. Avropa İttifaqı də 2026-cı ilin martında “Məhəmməd Rəsulullah” korpusunu Tehranda SEPAH və Bəsic qüvvələrinin koordinasiyasına görə ayrıca sanksiyalaşdırıb. Buna görə onun mümkün sıradan çıxarılması təsdiqlənərsə, bu, paytaxtdakı təhlükəsizlik idarəetməsinə ciddi zərbə sayılar.
