Vatikanın yeni rəhbəri Papa Leo papalığa seçildikdən sonra ilk Avropa səfərini Monakoya edib.
MSNews.az-ın məlumatına görə, bu, papaların Monakoya etdiyi ilk rəsmi səfər kimi təqdim olunur və sonuncu belə ziyarətin 1538-ci ildə Papa III Paulun dövründə baş verdiyi bildirilir. Bu hesabla səfər 488 ildən sonra gerçəkləşib.
Xəbərdə qeyd olunur ki, Papa Leo Vatikandan Monakoya helikopterlə yollanıb. Onu Monakoda şahzadə II Albert və şahzadə Şarlen qarşılayıb. Rəsmi qəbuldan sonra proqram çərçivəsində XIII əsrdən bəri Qrimaldi sülaləsinin iqamətgahı olan saraya səfər nəzərdə tutulub.
Vatikan sözçüsü Matteo Bruni Monakonu “geniş üfüqlərə malik kiçik ölkə” adlandırıb. O, bu səfərin simvolik məna daşıdığını vurğulayaraq, Monakonu “sərvət və nüfuzun məsuliyyətli istifadəsi sayəsində sülh laboratoriyası” kimi xarakterizə edib. Bu yanaşma Papanın Avropadakı ilk diplomatik marşrutunun niyə məhz Monakodan başladığını izah edən əsas mesajlardan biri kimi təqdim olunur.
Monako həm yüksək rifah səviyyəsi, həm də katolik kimliyi ilə seçilən Avropa ölkələrindən biridir. Məqalədə bildirilir ki, katoliklik burada rəsmi dövlət dini statusunu qoruyur. Həmçinin şahzadə Albertin yaxın vaxtlarda abortun leqallaşdırılması təklifini rədd etdiyi, “həyatın müdafiəsi” mövzusunun isə səfərin əsas ideya xəttlərindən biri olduğu vurğulanır.
Papa Leonun II Lui stadionunda keçiriləcək ayinində İtaliyadan gələnlər də daxil olmaqla 15 min nəfərin iştirakı gözlənilir. Səfər Vatikanın Avropadakı siyasi və dini mesajlarını yeni pontifikat dövründə hansı istiqamətdə quracağını göstərən ilk simvolik addımlardan biri kimi dəyərləndirilir.
