Avstraliyanın Yeni Cənubi Uels Universitetinin alimləri 113 ölkə üzrə apardıqları araşdırmada sosial şəbəkələrdə qadınların seksual görüntülü fotolar paylaşmasının gender bərabərsizliyindən daha çox iqtisadi qeyri-bərabərliklə əlaqəli olduğunu müəyyən ediblər.
Avstraliyanın Yeni Cənubi Uels Universitetinin alimləri qadınların sosial şəbəkələrdə niyə daha açıq və seksual görüntülü fotolar paylaşdığına dair araşdırmanın nəticələrini açıqlayıblar. Tədqiqat göstərib ki, bu davranışın əsas izahı bir çox hallarda patriarxal təzyiqdən daha çox iqtisadi qeyri-bərabərlik və sosial status uğrunda rəqabətlə bağlıdır.
Araşdırmanın aparıcı müəlliflərindən biri, Yeni Cənubi Uels Universitetində çalışan tədqiqatçı Xendis R. Bleyk bildirib ki, iqtisadi cəhətdən daha qeyri-bərabər mühitlərdə qadınların sosial mediada öz zahiri görünüşünü ön plana çıxaran paylaşımlar etməsi daha çox müşahidə olunur. Onun sözlərinə görə, bu cür paylaşımlar bəzən cəmiyyətdə sosial və iqtisadi üstünlük qazanmaq üçün istifadə edilən strategiyanın bir hissəsi kimi də qiymətləndirilə bilər.
Tədqiqat 113 ölkə üzrə aparılıb və nəticələr göstərib ki, “seksual selfi”lərin yayılması ilə gəlir bərabərsizliyi arasında müsbət əlaqə var. Xüsusilə, daha inkişaf etmiş ölkələrdə bu əlaqənin daha aydın hiss olunduğu qeyd edilir. Eyni araşdırmada gender bərabərsizliyi ilə bu tip paylaşımlar arasında isə güclü müsbət əlaqə aşkar edilməyib.
Universitetin yaydığı məlumatda qeyd olunur ki, iqtisadi qeyri-bərabərlik insanların sosial pilləkəndəki mövqeyinə daha həssas yanaşmasına səbəb ola bilər. Bu isə bəzi qadınların zahiri görünüşə, gözəllik xidmətlərinə və sosial şəbəkələrdə vizual təqdimata daha çox vaxt və resurs ayırmasına gətirib çıxarır. Tədqiqatçılar ABŞ üzrə əlavə yoxlamalarda da daha qeyri-bərabər bölgələrdə qadın geyimləri və gözəllik xidmətlərinə xərclərin daha yüksək olduğunu müəyyən ediblər.
X.Bleyk vurğulayıb ki, bikinidə və ya seksual xarakterli fotolar paylaşan qadınları avtomatik şəkildə “yüngül əxlaqlı” kimi qiymətləndirmək doğru deyil. Onun fikrincə, bu davranış daha çox mürəkkəb sosial və iqtisadi mühitdə fərdlərin öz mövqelərini gücləndirməyə çalışmasının göstəricisi ola bilər.
Mütəxəssislər qeyd edirlər ki, bu nəticələr qadınların sosial mediadakı davranışlarına daha sadə və stereotip yanaşmaların yetərli olmadığını göstərir. Araşdırma müəlliflərinin qənaətinə görə, belə paylaşımlar bəzən fərdi seçim, bəzən isə rəqabətli sosial mühitdə daha çox imkan əldə etməyə yönəlmiş davranış forması kimi başa düşülməlidir.
