2023-cü ildə xarici haker ABŞ Federal Təhqiqat Bürosunun Nyu-York ofisində saxlanılan və mərhum maliyyəçi Ceffri Epşteyn barədə aparılan istintaqa aid sənədlərə daxil olub. Bu barədə “Reuters” agentliyinə istinadən MSNews.az məlumat verir.
Məlumata görə, hadisə 2023-cü il fevralın 12-də baş verib. FTB-nin Nyu-York ofisində yerləşən Uşaq İstismarı üzrə Kriminalistika Laboratoriyasındakı server texniki səbəbdən qorunmasız vəziyyətdə qalıb və haker həmin sistemə daxil olub.
FTB hadisəni “təcrid olunmuş kiberinsident” kimi qiymətləndirib və bildirilib ki, hücum edən şəxsin sistemə çıxışı qısa müddətdə bloklanıb, şəbəkə isə bərpa edilib. Büro həmçinin araşdırmanın hələ də davam etdiyini açıqlayıb.
Sənədlərdə qeyd olunur ki, serverdə Epşteyn istintaqı ilə bağlı bəzi fayllar araşdırılıb. Lakin hakerin hansı konkret məlumatlara baxdığı, məlumatları yükləyib-yükləmədiyi və ya kim olduğu barədə dəqiq məlumat yoxdur.
Mənbənin sözlərinə görə, hücumu həyata keçirən şəxsin dövlət kəşfiyyatı deyil, fərdi kiberhücumçu olduğu ehtimal edilir. Bununla belə, Epşteyn işi ilə bağlı sənədlərin siyasət, biznes və akademiya dünyasındakı nüfuzlu şəxslərlə əlaqələrə işarə etməsi bu məlumatların kəşfiyyat orqanları üçün də potensial maraq kəsb etdiyini göstərir.
Ekspertlər hesab edir ki, bu hadisə Epşteyn istintaqı ilə bağlı materialların nə qədər həssas və strateji əhəmiyyət daşıdığını bir daha ortaya qoyur.
