Çin ABŞ-ı süni intellekt texnologiyalarının hərbi sahədə nəzarətsiz istifadəsinin ciddi etik və təhlükəsizlik riskləri yarada biləcəyi barədə xəbərdar edib.
Çin Müdafiə Nazirliyinin sözçüsü Xianq Bin bildirib ki, süni intellektin müharibə qərarlarına həddindən artıq təsir göstərməsi beynəlxalq təhlükəsizlik üçün ciddi nəticələr doğura bilər.
Onun sözlərinə görə, süni intellektin məhdudiyyətsiz şəkildə tətbiqi və alqoritmlərə “həyat və ölüm qərarı” vermək səlahiyyətinin verilməsi müharibədə etik qaydaların və məsuliyyətin zəifləməsinə səbəb ola bilər. Bu isə texnologiyanın nəzarətdən çıxması riskini artırır.
Xianq Bin qeyd edib ki, belə yanaşma bir gün məşhur “Terminator” filmində təsvir edilən distopik ssenarinin gerçəyə çevrilməsi ilə nəticələnə bilər. O vurğulayıb ki, hərbi süni intellekt tətbiqlərində insanın üstün rolu qorunmalı və bütün silah sistemləri insan nəzarəti altında qalmalıdır.
Çin rəsmisi əlavə edib ki, Pekin süni intellekt sahəsində əldə etdiyi texnoloji inkişafı digər ölkələrin suverenliyinə və ərazi bütövlüyünə zərər vermək üçün istifadə etməyəcək. Çin həmçinin bu sahədə qlobal idarəetmə mexanizmlərinin formalaşdırılması və risklərin azaldılması üçün ölkələr arasında əməkdaşlığa hazır olduğunu bildirib.
Ekspertlər qeyd edirlər ki, süni intellekt hərbi əməliyyatlarda məlumat analizi, planlaşdırma və simulyasiya kimi sahələrdə istifadə olunsa da, son qərarların insan komandirləri tərəfindən verilməsi beynəlxalq hüquq və məsuliyyət baxımından vacib hesab olunur.
