ABŞ-nin “Palantir Technologies” şirkətinin baş direktoru Aleks Karp süni intellektin Ukraynadakı müharibədə həlledici rol oynadığını və Avropanın gələcək təhlükəsizliyinin texnoloji müstəqillikdən asılı olduğunu bildirib.
MSNews.az xəbər verir ki, Karp “Axel Springer” rəhbəri Matias Döpfnerlə “MD MEETS” müsahibəsində Avropanın əsas probleminin istedad çatışmazlığı deyil, siyasi idarəetmə və texnoloji səriştə böhranı olduğunu deyib. O, ABŞ texnologiyalarından imtinanın öz-özlüyündə Avropaya suverenlik qazandırmadığını, bunun üçün qitənin rəqabətədavamlı alternativlər yaratmalı olduğunu vurğulayıb.
Karp Ukraynadakı müharibədən danışarkən daha sərt iddia səsləndirib: “Süni intellekt sistemləri olmasaydı, Rusiya qalib gəlmişdi”. Onun fikrincə, ABŞ, Ukrayna və İsrailin üstünlüklərindən biri real münaqişələrdən əldə olunan təcrübəni süni intellekt və məlumatların təhlili ilə birləşdirmələridir. Ukrayna Müdafiə Nazirliyi may ayında “Palantir”lə əməkdaşlıq nəticəsində hava hücumlarının təhlili sisteminin yaradıldığını, böyük həcmli kəşfiyyat məlumatlarının emalında süni intellektdən istifadə edildiyini və texnologiyaların uzaqmənzilli zərbələrin planlaşdırılmasına inteqrasiya olunduğunu açıqlayıb.
Karp xüsusilə Almaniyanı tənqid edərək ölkənin texnoloji və siyasi rəqabət qabiliyyətinin zəifləməsindən narahat olduğunu söyləyib. “WELT” yazır ki, “Palantir” rəhbəri Almaniyada miqrasiya və iqtisadi problemlərin açıq müzakirə edilməməsinin “Almaniya üçün Alternativ” partiyasının yüksəlişinə şərait yaratdığını düşünür. Bununla belə, Karp Rusiyaya və Çin rəhbərliyinə münasibətinə görə AfD-ni dəstəkləmədiyini bildirib.
“Palantir” rəhbərinin fikrincə, texnoloji suverenlik ilk növbədə dövlətin özünün kritik texnologiyalar yaratmaq qabiliyyətidir: bunu etməyən ölkələr xarici təchizatçılardan asılı vəziyyətə düşürlər. Avropada isə məhz bu məsələ “Palantir” ətrafında mübahisələrin əsas mövzularından biridir. Fransa daxili kəşfiyyat xidməti DGSI iyunda ABŞ şirkətinin sistemlərini mərhələli şəkildə Fransanın “ChapsVision” platforması ilə əvəzləmək qərarı verib. Paris bu addımı rəqəmsal və texnoloji suverenliyin gücləndirilməsi ilə əlaqələndirib.
Karp müsahibədə Çinin süni intellekt sahəsində sürətlə irəlilədiyini də qeyd edib və Avropanın ABŞ, İsrail və Çinlə rəqabət aparmaq üçün istedadları cəlb etməli, bürokratik maneələri azaltmalı və öz texnoloji ekosistemini yenidən qurmalı olduğunu bildirib. Onun Ukraynadakı müharibənin nəticəsi ilə bağlı fikirləri isə “Palantir” rəhbərinin şəxsi qiymətləndirməsidir və müharibənin gedişinə təsir edən çoxsaylı digər hərbi, iqtisadi və siyasi amilləri əhatə edən müstəqil nəticə kimi qəbul edilməməlidir.
